U·IATTIMGIPAONI
SHILLONG: Assam aro Meghalaya a·dokni simarango nirokna donako man·enggipa a·dokni police-rangna chu·onga gita silchidarerangko sorkari on·jaengani a·sel police-rang bilake kamrangko ka·na man·jaenga ine Barato-Mukroh constituency-ni MDC Aiborlang Shadap matnangataha.
Simarango nirokna donatako man·enggipa police-rangna nanga gita silchidarerangko on·jaengani gimin an·tangni suk ong·gijaniko parakatengon, “Simarango donatako man·gipa sipairang namen bilgrigiparangsa ong·a aro iana anga an·tangan kratchaa,” ine Shadap aganaha.
Simarango nirokenggipa police-rangko Meghalaya sorkari, ma·gri pagrirang gitasa jakkalenga ine matnangatengon, simarango nirokna donatako man·gipa Assam-ni police-rangde nanga gita silchidarerang dongani gimin pilak obostarangkon chagrongna gita man·enga ine Shadap parakataha.
Iani bidingo toe janapatengon, batanggimin jasana Lapangap-o donatako man·gipa Lumshnong-ni police battalion-rang, gol·dik aro danilrangkosan jakkalna gita man·paenga ine Shadap parakataha.
JHADC MDC-ni parakatani gitade, Mukroh-o donako man·enggipa police-rangnaba namgipa dongchakanirangko on·jaengani a·sel police-rang, neng·nikanirangko chagrongna nangtokenga aro Saba-o donggipa temporary battalion camp-oba police sakdokmangmangsan nirok sandianirangko dakenga.
Assam baksa tosusagenchimode simarango donatako man·gipa Meghalaya police-rangde namen komibata ine janapatskaengon, Saba, Mukroh aro Barato-ode Meghalaya sorkari, chu·gimik silchidarerang baksa police dolrangko donna gita nangachim ine Shadap parakataha.
Sima jolrango songdongenggipa manderangko nambate nirok sandina man·na gita ia jolrangosa police outpost-rangko bang·bate donatna nanga ineba Barato-Mukroh MDC dabiangaha.
“An·ching a·doktangni simakon chel·chakna man·jaenga ong·ode a·doktangni manderangko maikai chel·chakgen? Chinga salantian chingni a·arangko gimaatna nangenga aro ian namen dukni katta ong·a,” ine Shadap aganaha.
