U·IATTIMGIPAONI
SHILLONG: Voice of the People’s Party (VPP)-na West Bengal a·dokni Trinamool Congress (TMC) dolsa dakchake on·enga ine adita salrangna skang, Khasi Hills Autonomous District Council (KHADC)-ni chief executive membor (CEM) Pyniaid Sing Syiem-ni matnange agananiko, VPP-ni dilgipa Batskhem Myrboh jegalatenba, uni agangipa kattarangara ‘bi·sarangni chanchie’ agana gitasan ong·aia ine parakataha.
VPP dolna West Bengal a·dokni TMC dolsa dakchake on·enga aro TMC-ni ‘Ruan’ noksara Khasirangni jakkalgipa ruan ong·ja indiba West Bengal a·doknisa ine adita salrangna skangsan KHADC-ni CEM aganahachim ine nikna man·a.
Uni iandake agananiko jegalatskaengon, “Ian uni (Syiem) politics-ni gimin ma·sigijaniko aro name poraichenggijaniko mesokanisa ong·enga. Uni iandakgipa kattarangna chinga aganchakgenchimoba an·tangtangni somoiko bon·ata gitasan ong·aigen. VPP-ko TMC baksa bak dongate agananiara ka·dingna agana gitasan ong·aia,” ine Myrboh aganaha.
Syiem-ni bi·sa gita chanchie agananiara maming pangchakani grigipasan ong·aia aro manderang iani gimin talen ma·sia ineba ua aganaha.
“Chingni party-ko a·dokni manderang namen ma·sitoka aro ua (Syiem) VPP-ni kosako aganna gita maming nama kattarang dongjagenchimode chinga unbaksa golpoe rona somoiba dongskaja,” ine VPP-ni ku·wattimgipa aganaha.
MUDA building bye-laws-ni bidingo VPP-ni dilgipa Ardent Miller Basaiawmoit, a·dokni gitcham chief minister Dr Mukul Sangma baksa jak donga ine KHADC CEM-ni matnanggipa kattarangna aganchakaniko on·angskaengon, Laitkor-o jinma tom·aniko ong·atani somoion iani bidingo chu·gimik talatanirangko on·manaha ine Myrboh parakataha.
