U·IATTIMGIPAONI
SHILLONG: Re·anggipa Sonibar salo, ma·mongni Union Health Minister Mansukh Mandaviya, Shillong songjinmao donggipa North Eastern Indira Gandhi Regional Institute of Health & Medical Sciences (NEIGRIHMS)-ni regional cancer centre baksama gital undergraduate medical college, nursing college building, dingtang dingtang hostel-rang, damchet modular operation theatre, virtual autopsy room aro gital guest house-ko nokdonggae on·angaha.
NEIGRIHMS-o ge 150 palangrang donggipa critical care block-ko rikna gitaba ua pangchakaniko songe on·angjolaha.
Ia tom·anio Union Health Minister, jinmana aganprakangengon, salgro salaram a·dokrango songdongenggipa manderangna namgipa sanna banani cholrangko on·na gita ma·mong sorkari, gisiko nange kamko ka·enga ine parakangaha.
NEIGRIHMS-o a·bachengatenggipa ia gital cholrangan medical professional-rangko salbana aro salgro salaram jolo dongkame kamko ka·na didiani ong·gen ineba Mandaviya aganaha.
NEIGRIHMS-o kam ka·ani bewalrangna aro rongtal an·talanirangko rakkiengani giminba ua mittelpilangaha.
“Chinga sanna banani cholrangkosan bikotenga ong·ja indiba doctor aro nurse-rangko bariatna gitaba kam ka·enga. Batanggimin bilsiskuni gisepo a·songo medical college-rang changgni bariangaha aro a·song gimiko dam lak 1.7 health & wellness centre-rangkoba kuliaha. A·songni a·ja damantion chinga critical care unit ge·prakko rike on·enga,” ine Union Minister aganaha.
Mandaviya-ni parakatani gitade, 2014 bilsioni batanggimin bilsiskuni gisepo a·songo MBBS seat-rangba dam 50,000-oni dam lak 1.07-ona bariangaha.
“NEIGRIHMS-ko a·songo damsa nambatsranggipa sanchakram ong·atna ma·mong sorkari miksongenga,” ine Mandaviya parakataha.
