U·IATTIMGIPAONI
TURA: Garo Hills Autonomous District Council (GHADC)-ni ning·o donggipa Tura GDC Constituency-na National People’s Party (NPP)-chi chalaienggipa Executive Committee (EC), gong lak 15 tangkarangkosan chamaiahani a·sel constituency-ni ning·o donggipa dingtang dingtang biaprango namroro silroroaniko ra·baanio aro manderangna dakchake on·anio neng·nikanirangko chagrongna nangenga aro iani niamko pe·ani gitaba ong·enga ine Robibar salo, Tura-ni BJP MDC Bernard N Marak, Meghalaya a·dokni Chief Minister aro NPP-ni national president Conrad K Sangma-na sedoataha.
Marak-ni Chief Minister-na sedoatgipa chittio parakatani gitade, NPP aro BJP dolrangara ma·mongo aro a·dok sorkarioba nangrimenggipa dolrangan ong·achim indiba GHADC-ode NPP-chi chalaienggipa EC, BJP aro gipin MDC-rangnade dingtang dingtang scheme-rangko on·gija nichanggala gita ong·engachim.
“Fifteen Commission-ni ning·o Rural Local Body (RLB)-rang gita ma·mong sorkarini on·atenggipa namroro silroroatani tangka paisarangkoba GHADC-o NPP-ni chalaienggipa EC, BJP aro gipin dolni MDC-rangnade tikatjaenga,” ine Marak parakataha.
Tura constituency-o mande jelbra jelsuani aro voter-rangba batani gimin GHADC constituency-rangoni Tura constituency-an dal·batsranggipa constituency ong·enga ine janapatengon, GHADC-o NPP-chi chalaienggipa EC, mikkang nitee, tangka paisarangko chamengani a·sel Tura constituency-ni manderangde nangchongmotgipa man·na nanganirangkon man·tokjaenga ine Tura MDC parakataha.
“Uni gimin iani bidingo am·sandiatenba, BJP-ko gipin dake ra·jana gita EC-na ge·etaniko on·china anga nang·ko mol·molenga. Tura constituency-ni ning·o donggipa manderangba pilak namgnirangko man·pachina gita tangka paisarang pilakkon apsan ong·e sualna nanga,” ine Marak parakataha.
GHADC-o grorang bang·engahani gimin aro kam ka·giparangnaba dormaharangko on·na man·jaengani gimin royalty aro gipin man·gnirangoniko GHADC-ni man·na nangenggipa bakrangko ta·raken matchote on·china gitaba Tura-ni BJP MDC, a·dokni Chief Minister-ko didiataha.
