U·IATTIMGIPAONI
SHILLONG: Mongolbar salo, a·dokni Chief Minister Conrad K Sangma, CM Elevate program-ko Jowai-o a·bachengate on·angaha aro ia program-ko a·bachengatanio MLA Wailadmiki Shylla, MLA Santa Mary Shylla, MLA Lahkmen Rymbui aro dingtang dingtang official-rangba dongpae bak ra·angaha.
Ia tom·anio a·dokni Chief Minister, jinmana aganprakangengon, bilsiantian sak 7000-na bate chadamberang kamrangko ka·e cha·na cholrangko sandiengani gimin chadamberangko kamo ra·na gita sorkari, dingtangmancha niamrangko tarina nanga ine parakataha.
“Hajalni hajal chadamberang sorkarini kamrangko ka·na gita sandienga aro uamang pilakkode sorkarini kamrango napatna chol ong·ja. Meghalaya Public Service Commission (MPSC) aro District Selection Committee (DSC)-ni gita bilsio sak 1500-mangkode sorkarini dingtang dingtang department-rango rimnapna man·enga,” ine Sangma aganaha.
CM Elevate program-ni bidingo jinmana talataniko on·angengon, ia program-ni ning·o, bading chiwalgiparangna, self help group (SHG)-rangna aro uandake an·tangtangko dakchakenggipa dingtang dingtang dolrangna 30 percent-oni 75 percent-ona kingking subsidy-rangko on·ani donggen ine Chief Minister parakataha.
Ia CM Elevate program-na sorkari, gong crore 300 tangkarangko chame donaha aro ia program-ni ning·o sak 20,000-mangni gita bading chiwalgiparangna sorkari dakchake on·anggen ineba Chief Minister parakataha.
A·dok sorkarini a·bachengatgipa PRIME aro CM Elevate gita dakgipa program-rangchi chadamberangna dingtang dingtang janggi tangani cholrangko on·na jotton ka·enga ine janapatengon, “Chadamberangna kamrangko tikate on·na man·jaengahani gimin chingni sorkari dingtangmancha bading chiwalani a·baoba dingtang dingtang cholrangko on·na a·bachengataha aro ia ja·ku de·anichi da·o bilsi 10-15-ni ja·man, kamrangko tikate on·anio biterangko nikna man·gnok,” ine Sangma aganaha.
Iandakgipa cholrangko da·onin tarisamsojagenchimode mikkangchi iana bateba neng·nikanirangko chagrongna nanggen ineba ua aganaha.
CM Elevate program-chi da·o bilsi bongani gisepon bading chiwalani a·bao ming 50,000-na baten kamrangko nakatate on·na sorkari nisanko donmanaha ineba Chief Minister parakataha.
Ia program-ko ong·atanio a·dokni Chief Minister, Jaintia Hills-ni dingtang dingtang village organization-rangna aro chadambe dolrangna Yess Meghalaya, Green Meghalaya aro SHG Movement-ni ning·o gimik gong crore 1.25-ni cheque-rangkoba suale on·angjolaha.
Ia apsan salon ua Jowai-o donggipa U Kiang Nangbah College aro Jowai Civil Hospital-koba niangjolaha.
