U·IATTIMGIPAONI
SHILLONG: MePDCL-ni NTPC-na gro nangkuenggipa tangkarangko chotna gita Budbar salo, Meghalaya sorkari dakchakanirangko on·na tik ka·angaha.
MePDCL-ni NTPC-na bangki dongkuenggipa gong kror 565 tangkarangko chotanio dakchakanirangko on·na gita Budbar salo, Meghalaya Cabinet-ni tom·anio tik ka·angaha.
NTPC-na MePDCL, gong kror 665-mangni gita gro dongkuenga ine adita salrangna skangsan, a·dokni Power Minister AT Mondal parakatahachim ine nikna man·a.
Power Minister-ni u·iatani gitade, NTPC-ni official-rang baksa agangrikani ja·man MeDCL-ni groko gong kror 565-ona komiatahachim.
Ia grorangko MePDCL, NTPC-na chotna man·jaengani gimin a·dok sorkarini dakchakaniko bi·aha aro uandaken ia grorangko chotna gita a·dok sorkari, Bristibar salo tik ka·angaha.
