U·IATTIMGIPAONI
SHILLONG: Constitution (125th Amendment) Bill 2019-ko da·o Parliament-ni Winter Session-ona BJP-chi dilenggipa NDA sorkari ra·bapiltaiani cholrang donga ine Shillong-ni Lok Sabha MP Vincent H Pala parakataha.
Pala-ni aganani gitade, ia bill-ko skanggipa changna 2019 bilsio Rajya Sabha-o ra·baahachim aro uni ja·man ia Bill-ko Parliament Standing Committee (PSC)-na watatahachim.
Ia Bill-ko man·soani ja·man PSC, Meghalaya a·dokko man·chape autonomous district council (ADC) donggipa pilak a·dokrangonan re·angaha ineba Pala aganaha.
“Sixth Schedule-ko taridapani bidingo dingtang dingtang a·dok sorkarirang aro ADC-rangba ma·mongni Home Affairs Ministry-na ku·pattianirangko on·ataha aro da·o ia bill-ko ra·bapiltaianide ma·mong sorkarini jakosajok,” ine ua aganaha.
Ia bill-ko ra·bapiltaia ong·ode Lok Sabha-o salsamangsan chanchirimna nangaigen aro Rajya Sabha-oba bang·e chanchirimna nangjawa ine Shillong MP parakataha.
Pala-ni aganani gitade, Sixth Schedule amendment-ko Parliament ra·chakchina gita BJP-ba nangnikengachim.
ADC-rango seat-rangko bariatna aro tangka paisani gita dakchakanirangko bariatna gita pilak a·dokrangan Sixth Schedule-ko taridapchina nangnikenga ineba ua aganaha.
Meghalaya a·dokko man·chape salgro salaramni dambri a·dokrango ADC-rangko bilakbatatna gita Constitution (125th Amendment) Bill 2019-ko a·songni gitcham Union Home Minister Rajnath Singh, 2019 bilsini February 6 tariko Rajya Sabha-ona ra·angchengahachim ine nikna man·a.
Rajya Sabha-ona ra·angani ja·man ia bill-ko salgro salaramni dambri a·dokrangona watate iani bidingo an·tangtangni chanchianirangko on·china ma·mong sorkar u·iatahachim.
