U·IATTIMGIPAONI
SHILLONG: Garo Hills-ko man·chape a·songni dingtang dingtang biaprango rel ramarangko tarianichi bang·a namgnirangko man·tokengaha ine a·dokni Cabinet Minister aro Raliang MLA Comingone Ymbon janapatenba, a·dokona rel garirangko ra·baanichi a·dokna aro mongsongbate Jaintia Hills a·janaba namgnirangko ra·bagen ine parakataha.
Garo Hills-ona rel ramako tarianganichi da·o manderang, Mendipathar-oni Guwahati-ona gong 30-mangmang koros ka·e songrena gita man·engaha ine an·tangni Garo Hills-ona re·bae nikanganiko toe janapatengon, Jaintia Hills-ona rel ramarangko tarianggenchimode ian a·jani manderangna bang·en namgniko ra·bagen ine Ymbon parakataha.
Ymbon-ni parakatani gitade, Mendipathar-oni Guwahati-ona gipin garirango songregenchimode gong 280-mang koros ka·na nangeng indiba rel gario songregenchimode gong 30-mangkosan koros ka·na nangskaenga.
“Mendipathar-ni manderang, pring 7:00 bajio an·tangtangni bosturangko ra·e rel gario Guwahati-ona re·angenga aro attamon noktangtangona re·angpilna man·enga,” ine ua aganaha.
August jao Mendipathar-o merong kg 1-ni dam gong 31-san indiba Shillong-ode gong 44 ong·skaengachim ineba Food & Civil Supplies Minister parakataha.
“Koela, rong·chun aro uandakgipa bosturangkoba truck garirango ton-prako gong 2000/- ka·e salrurana nangenga indiba ia bosturangko rel garirangode ton-prako gong 500/-san koros ka·na nangaigenchim. Rel garirango bosturangko salruraanichiba manderang bang·en koros komiatna man·gen,” ine Ymbon, talataniko on·angaha.
Jaintia Hills-ona rel garirangko ra·bagenchimode manderang kamrangkoba ka·e cha·na cholrangko man·gen ineba ua aganaha.
Maini gimin dingtang dingtang dolrang, rel garirangko jegalsotokenga ine sing·on, NGO-rangara a·dokni namgnina chanchie ja·ku de·enga indiba manderangara an·tangtangni namgnina chanchiskaa ine Cabinet Minister parakataha.
