U·IATTIMGIPAONI
WILLIAMNAGAR: Re·anggipa October 16 tarikoni October 21 tarikona Meghalaya sorkarini Sports & Youth Affairs Directorate-ni gita NEHU Shillong Campus-o ong·atanggipa State Level Youth Exchange Program-o Williamnagar Government College-ni chatro chatrirang chu·sokgipa ong·na man·aha ine kobor on·aha.
Koborko on·ani gitade, ia program-o Williamnagar Govt College-ni chatro chatrirang, Folk Dance competition, One Act Play, Guitar, Flute, Quiz, Extempore Speech aro Art & Crafts (Painting)-o bakko ra·angaha aro uandaken Folk Dance Competition-o Williamnagar Govt College-ni chatro chatrirang, Wangala chroke skanggipa boksisko man·aha. One Act Play ba dakmesoksusaanioba Williamnagar Govt College-ni chatro chatrirang, Lindrid D Shira-ni segimin golpoo pangchake dakmesokenba, gnigipa boksisko man·aha. Una agreba, Flute ba bangsi siksusaanio college-ni chatro Pringstone C Marak aro guitar doksusaanioba sakgipin chatro Sallim Sangma gnigipa boksisrangko man·aha ine kobor on·aha.
Williamnagar Govt College-ni chatro chatrirang ia State Level Youth Exchange Program-o chu·sokgiparang ong·ahani gimin re·baenggipa 2024 bilsini January jao ong·atnasienggipa National Level Youth Exchange Program-o bakko ra·na gita seokako man·aha.
