U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong aro Tura Parliamentary seat-rango susana gita da·o dipet United Democratic Party (UDP)-ni candidate-rangko seokkujaenga ine u·iataha.
Lok Sabha election-o susana gita candidate-rangko seokani bidingo chanchirimna UDP-ni core committee, skanggipa changna Budbar salo tom·ahachim indiba da·o dipet candidate-rangko name nipiltaia dongkuja ine UDP-ni general secretary Jemino Mawthoh parakataha.
“Chinga bakan MLA-rang, MDC-rang aro chubata gadangni dilgiparang baksa apsan tom·e chanchirimangtaigen,” ine Mawthoh aganaha.
Lok Sabha election-o susana gita bang·a manderangan UDP-ni tikitna agangrikenga ine janapatengon, “Songbadrango PT Sawkmie, Robertjune Kharjahrin aro Prof DRL Nonglait-ni bimingrangkode na·simang nikmanenggnok. Uamangna agreba chingo candidate-na dorgasto galgiparang dongkuenga,” ine Mawthoh parakataha.
Ia sakgittam dilgiparangni bimingrangko UDP-ni candidate-na mingengani gimin janapatengon, uamangba gipinrang gitan tikitna dorgasto galgiparangsan ong·aia aro uamang da·o dipet candidate-rangko seoka dongkujaenga ine UDP-ni general secretary parakataha.
Khasi aro Jaintia Hills a·jarango manderang baksa name chanchichengani ja·mansa candidate-rangko seokgen ineba ua aganaha.
Khasi aro Jaintia Hills a·jarango sak 12 MLA-rang aro sak 17 MDC-rang gnang ine janapatengon, Khasi aro Jaintia Hills a·jarangode UDP namen bilakgipa ong·aha aro ia bilsini Assembly election-oba 24% vote share-ko man·aha ine Mawthoh parakataha.
“Chingni bilakrorobaenganiko nike chinga chegipa ong·na ka·dongenga,” ineba ua aganaha.
