U·IATTIMGIPAONI
SHILLONG: Shillong songjinmao songdongenggipa manderangna PHE department-ni on·enggipa chiara ringna namaia ine PHE Minister Marcuise N Marak aganahani gimin, minister-rangko aro sorkari officer-rangkoba ia chiko chekgija ringskachina FKJGP ra·biataha.
Meghalaya a·dokni skotong Shillong songjinmao songdongenggipa manderang, ringani china jajrenge dongtokengon, Shillong-o songdongenggipa manderangna PHE department, namgipa chikon on·enga ine a·dokni PHE Minister Marcuise N Marak a·kangatahachim.
Adita salrangna skangsan, FKJGP dolni gita Shillong songjinmani dingtang dingtang gittimrango ringna jakkalenggipa chirangko porikka ra·e nina on·atani ja·man, Shillong songjinmani dam 40 gittimrango ringna jakkalenggipa chirangde ringna namja ine ma·sina man·ahachim.
Indake ong·engon, Shillong songjinmao songdongenggipa manderangna PHE department-ni on·enggipa chirangara ringna namaia ine PHE Minister-ni agananiko FKJGP jegalatskaenba, a·dokni minister-rang aro sorkari officer-rangba ia apsan chikon aqua guard gita dakgipa bosturangchi chekgija ringskachina ra·biataha.
“Secretariat-o minister-rangni aro sorkari officer-rangni aqua guard-rangchi chirangko chekna jakkala gita ramram cholgri manderangde man·paja. Uni gimin manderangna on·enggipa chiara ringna namaia ine PHE Minister a·kangenga ong·ode, minister-rang aro sorkari officer-rangba ia apsan chikon chekgija ringchina,” ine FKJGP-ni president Dundee C Khongsit ra·biataha.
Khongsit-ni parakatani gitade, chirangko porikka ra·ani sample report-rangko uamang a·dokni Chief Minister Conrad K Sangma aro Health Minister Ampareen Lyngdoh baksana PHE Minister-naba on·atahachim indiba uamang ia report-rangkon nina gisiko nangja gita ong·ahachim.