U·IATTIMGIPAONI
SHILLONG: Sixth Schedule-ni ning·o ga·akgipa biaprango land records ba a·ani gimin see rakkianirangko digitise ka·na ba computer aro internet-rangchi rakkina gita a·dok sorkari, a·dokni damgittam autonomous district council (ADC)-rangna pakwate on·angaha.
Sukrobar salo, a·dokni damgittam ADC-ni membor-rang baksa tom·e chanchirimangani ja·man kobor ra·timgipa manderangna talatangengon, ia skanggipa bako sorkarini a·a, revenue-ni a·a aro cantonment-ni a·arangko digitise ka·chenggen ine a·dokni Deputy Chief Minister Prestone Tynsong parakataha.
Deputy Commissioner-ni office aro District Council-rango register ka·gipa a·arangko skanggipa digitise ka·chenggen ine janapatengon, register ka·gijagipa a·arang aro boksis gita on·gipa a·arangkode DC office ba a·jatangtangni district council-rang digitise ka·na nanggen ine Deputy Chief Minister parakataha.
“Je manderang ba dolrangan an·tangtangni a·arangko register ka·kujachim uamangna nanga gita a·a lekkarangko on·anide ADC aro DC office-ni kam ong·gen aro lekkarangko on·manahaon, uandakgipa a·arangkoba digitise ka·gen,” ine Tynsong aganaha.
Ia kamko matchotatna dongimin somoini gimin sing·on, ia kamko ta·raken ka·gnok maina land record-rang dongahaode a·doko a·ana golmal ong·anirangko komiatna man·gnok ine Deputy Chief Minister parakataha.
