U·IATTIMGIPAONI
TURA: Da·al Sonibar saloni a·bachenge salgnina Tura Diocese-ni Golden Jubilee ba bilsi 50 gapaniko Don Bosco Higher Secondary School kal·chakram aro Tura Sacred Heart gilja noko maniengani gimin West Garo Hills a·jani police-rang, ia manianiona re·baenggipa gari gorarangna niamrangko donataha.
West Garo Hills SP-ni parakatani gitade, VIP-rangni garirangna parking-ko Don Bosco School kal·chakramo, delegate (official)-rangni garirangna Don Bosco College, dal·dalgipa aro chonchongipa garirangna Tura Government College kal·chakram (Te·teng A·ja) aro chonchongipa garirangna Mission Compound kal·chakramoba tarisoaha.
‘No Parking’ aro ‘No Entry’-ni gimin janapatskaengon, garirangko Don Bosco Boys Hostel bibrao, St Xaviers HS School bibrao, Government College Girls Hostel bibrao, Te·tengkol bibrao (one way entry point) aro Chandmary bibrao (Leper Colony bibraona kingking one way entry point) ong·e garirangko donna man·jawa ine SP parakataha.
Tura Diocese-ni Golden Jubilee-ko maniengmiting somoio darangba neng·nikanirangko ra·bajana gita aro ia manianiko tom·tome matchotatna man·na gita ia niamrangko ja·rikchina gitaba ua manderangko didiataha.