U·IATTIMGIPAONI
SHILLONG: An·seng baljokaniko on·ani kamrango Accredited Social Health Activist (ASHA) worker-rangara village head council-rangni nitimanio, an·tangtang dangdike on·giparangsa ong·a aro uamangna on·enggipa dormaharangara kraa gitan ong·a ine a·dokni Health Minister Ampareen Lyngdoh, Sombar salo parakataha.
A·dokni ASHA worker-rangna dormaharangko bariatani bidingo sing·anina aganchakaniko on·angengon, a·doko dam 7000-mangni gita songrang donga aro ia songrango ASHA gita dakgipa health worker-rangara, bilsi 2-3-na an·tangtangan dangdike on·giparangsa ong·a ine Lyngdoh parakataha.
ASHA worker-rang, uamangni kam mingantinan dingtang dingtang man·gnirangko man·enga ine janapatengon, batanggimin somoirango ASHA worker-rang an·tangtangni man·gnirangko bang·en man·tokkujaengachim indiba sorkari, uamangni man·gnirangko chu·gimik on·tokaha aro ASHA worker-rangni man·gnirangko sorkari nangani krian on·enga ine Health Minister parakataha.
ASHA worker-rangara an·tangtang dangdike on·giparangsa ong·ani gimin sorkari ba health department-ni bil ning·o ong·na man·ja ineba ua aganaha.
Indake ong·engon, ASHA worker-rangni jingjengatanina Health department-ni Joint Secretary-ba suk ong·gijaniko parakatenba, a·doko ‘ASHA First’ application-ko ra·gatanionin National Health Mission (NHM)-ni ning·o ASHA worker-rangni man·gniko ta·raken on·na a·bachengaha ine parakataha.
Joint Secretary-ni parakatani gitade, ‘ASHA First’ application-ko 2022 bilsini October jao a·bachengataonin somoi gita ASHA worker-rangni man·gnirangko on·engaha aro batanggimin ja 12-ni gisepon ia application gita gong kror 21.89-ko on·ate, ja 18-ni gisepo gimik kror 34.50 tangkarangko gamatahachim.
“Meghalaya Maternity Benefit Scheme (MMBS) aro Meghalaya ASHA Benefit Scheme (MABS)-ni gong kror 53 tangkarangba 2013 bilsionin bangki dongkuengachim indiba ia tangkarangko 2021-22 bilsini gisepo sorkari a·dok gimiknan watataha,” ine Health department-ni Joint Secretary parakataha.
ASHA worker-rangni dingtang dingtang neng·nikanirangko nike a·dok sorkari, State Scheme-ni ning·o jaanti gong 2000/-ko on·enga ine janapatskaengon, “ASHA worker-rang nanga gita dormaharangko man·china gitasa sorkari ia pilak kamrangkon ka·enga aro da·alo bang·a ASHA worker-rangan an·tangtangni man·gnirangko somoi gita man·tokengaha,” ine Joint Secretary parakataha.
Je biaprangon re·a doani cholrang namen neng·ani ong·achim, uandakgipa biaprango songtangtangonin skie ra·gimin nurse-rangko sandienba, sanna banani kamrangko ka·atchina gita a·dok sorkari, Village Health Council-rangna u·iataha ineba Health department-ni Joint secretary parakataha.
