U·IATTIMGIPAONI
TURA: Nokrek National Park-o gimagipa BSF commandant-ko Sombar salo konta 8-mangna sandiani ja·man walni 10:00 bajimango man·pilaha.
BSF official-rangni u·iatani gitade, Sombar pringo 200 Battalion BSF-ni official-rang, Nokrek National Park-ona re·angahachim indiba Sombar pringni 10:30 bajimango 200 Bn BSF-ni Commandant Raj Narayan Mishra, maibakae unbaksa re·anggipa doloni ma·ekangenba Nokrek a·brio gimaahachim.
Uni gimaanga bakan unbaksa re·anggipa BSF sipairang, songni manderang, Forest aro Police official-rang baksa uko sandina a·bachengataha.
Kontachetmangna uko sandiani ja·man, bon·kamao Nokrek National Park-ni km 7-mang diltugipa biaponiko man·pilaha ine kobor on·aha.
Koborko on·ani gitade, Sombar pringo BSF official-rang, diltimgipa manderangko rimgija an·tangtangsa Nokrek a·briona doangaha aro uandaken uamang diltugipa a·briona doangani ja·man BSF-ni commandant ua biapo brangangahachim.
Indake ong·genchimoba, ja·mano unbaksa re·anggipa BSF official-rang, Police aro Forest official-rang baksana songni manderangna kobor on·ataha aro uandaken ja·mano uko jinma sandienba, walni 10:00 bajimango uko man·pilaha.
