U·IATTIMGIPAONI
SHILLONG: Meghalaya a·doko Accredited Social Health Activist (ASHA) worker-rangni dormahako gong 2000/-oniko gong 5000/-ona bariatchina dabie, November 27 tarik dipet indefinite strike ba ari gri kam dontongate jingjengatna manchianiko Sukrobar salo, Meghalaya ASHA Workers Union (MAWU) ra·galatpilaha.
Sukrobar salo, MAWU-ni membor-rang, Shillong songjinmani Golflink Community Hall-o tom·e chanchirimani ja·man kobor ra·timgiparang baksa agangrikengon, November 27 tarikoni indefinite strike ka·na manchianiko uamang ra·galatpilna tik ka·aha indiba ASHA-rangna sorkarini ra·gatenggipa Community based Health Incentives (CHI) scheme baksana ASHA-rangna dormahako gong 2000/-oni gong 3000/-ona bariatna tik ka·anikode uamang ra·chakama ra·chakjawa name tik ka·kujaenga ine MAWU-ni president Marajune Myrsing parakataha.
ASHA worker-rangni dormahako gong 2000/-oni gong 5000/-ona bariatchina dabianiko adita salrangna skangsan sorkari ra·chakjahachim indiba ASHA worker-rangni re·ruraani koros aro dingtang dingtang nanganirangko on·na gita Community based Health Incentive (CHI) minggipa scheme-ko on·skana aro dormahako gong 2000/-oniko gong 3000/-ona bariatna gita sorkari tik ka·angahachim.
Ia gital scheme-ni ning·o, a·doko an·o donggipa me·chikrangni aro bi·sa bakgitchakrangni sianiko komiatna gita rakbee kam ka·enggipa ASHA worker-rangna dingtang dingtang nanganirangko on·na cholrangko man·gen ineba a·dokni Health Minister Ampareen Lyngdoh parakatahachim.
Indake ong·engon, ASHA-rang bakan an·tangtangni kamrangko ka·piltaignok ine MAWU-ni president parakataha.
A·doko ASHA worker-rang, an·tangtangni japrako man·enggipa dormahako gong 2000/-oni gong 5000/-ona bariatchina dabie, kamtangtangko dontongatahani a·sel dingtang dingtang songrango manderangna sanna bananirangko on·anio neng·nikanirangko man·na nangengahachim ine nikna man·a.
 |
ReplyForward
|
