U·IATTIMGIPAONI
SHILLONG: Meghalaya a·doko Trinamool Congress (TMC) Parliamentary Party-ni dilgipa Mukul Sangma, Bharatiya Janata Party (BJP)-o napskana miksonge BJP-ni dilgiparang baksa agangrikenga ine jangbingbanganirangko knasona man·engon, BJP-ni dilgiparang baksa agangrikaniko ua ku·rachakaha indiba ian batanggimin bilsirango ong·gimin obostasa ong·achim ine talataniko on·angaha.
“Ian namen gitchambegipa kattasa ong·aia. Anga an·tangba songbadrango seaniko poraiaha aro ia seanirangko poraion ia kattarangara badiaba kobor on·timgiparangni kattarangsan ong·aia ine ma·sina man·aha. Uamangni agangipa kattarangko nigenchimode ian skango ong·anggimin kattarangko janapanisan ong·aia,” ine Sangma aganaha.
Sangma-ni parakatani gitade, ua BJP-ni dilgiparang baksa 2019-2020 bilsirangosa agangrikahachim.
“Kakketko agangenchimode 2019-2020 bilsirangosa BJP-ni dilgiparang, senior minister-ni level-o agangrikanirangko dakna nangnikahani gimin anga uamang baksa golpogrikaha. Ua somoio uamang 2023 bilsini election-na angbaksa agangrikna nangnikahani gimin anga uamang baksa agangrikaha,” ine TMC-ni dilgipa aganaha.
2020-2021 bilsirango ua Congress dolko watna manchimanahani giminsa maming ong·gijaniko nikjae BJP-ni dilgiparangni agangrikna okamaniko ra·chakaha ineba ua aganaha.
Una skang BJP, dingtang dingtang dilgiparangko uona watatahachim ineba Sangma parakataha.
TMC-o napangani gimin janapatskaengon, ia bilsini Assembly election-o uamang chu·soksranggipa ong·na man·jahaoba Meghalaya a·doko TMC-ko bilaken rikna man·aha ine TMC Parliamentary Party-ni dilgipa parakataha.
TMC-ni adita sak MLA-rang baksa Mukul Sangma, BJP-o bakrimna gita Delhi-ona re·ange ma·mongni dilgiparangko gronge agangrikaha ine adita salrangna skangsan dingtang dingtang songbadrango parakanirangko nikna man·ahachim.
Mukul Sangma BJP-o napbebegenchimode uan BJP-na nambatgenchim ine BJP-ni state president Rikman Momin-ba aganahachim.
