U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong aro Tura Lok Sabha seat damgnion me·chikrangko susaatchina gita a·dokni Cabinet Minister aro BJP-ni dilgipa AL Hek, Bharatiya Janata Party (BJP)-ni dilgiparangna ku·pattianiko on·ataha.
Iani bidingo kobor ra·timgipa manderang baksa agangrikengon, me·chik candidate-ko susaatna man·ode BJP-na nambatgen aro susanagipa candidate-rang donggenchimode Shillong aro Tura Lok Sabha seat damgnion me·chikrangko susaatchina ua BJP-na ku·pattianiko on·enga ine Hek parakataha.
Me·chik candidate-rangko susaatna miksongenggipani bidingo sing·on, me·chikrangna seat-rangko donna gita ku·rachakenggipa Women’s Reservation Bill-ko BJP-chi dilenggipa sorkari pass ka·aha aro iako BJP mande ra·na nanga ine Hek parakataha.
A·dok damgittamo ong·atanggipa Assembly election-o BJP-ni chu·sokgipa ong·ahani gimin an·tangni kusi ong·aniko parakatengon, ian re·baenggipa 2024 bilsini Lok Sabha election-o BJP-ni chegopna sienganiko mesoksoanisa ong·enga ine Hek parakataha.
Telangana aro Mizoram gita dakgipa a·dokrango chu·sokjahani gimn sing·on, ia a·dok damgnioba BJP-na vote on·anirangde bataha ine Hek parakataha.
Meghalaya a·dokni Lok Sabha seat damgnian BJP-na mongsonggipa seat-rang ong·enga ine janapatskaengon, ia election-o chegipa ong·na gita BJP, a·dokni gital office bearer-rang baksa nangrime kamko ka·enga aro ua susaa susajanide ma·mongo BJP-ko dilenggiparangni skanionisa ong·aigen ine BJP-ni Cabinet Minister parakataha.
