A·songo kangalbatgipa a·dok ong·genchimoba, Festival-ko ong·atna tangka bang·a: BJP

U·IATTIMGIPAONI…
SHILLONG: Meghalaya, India a·songoni gnigipa kangalbatgipa a·dok ong·naba gnang, skotong Shillong-ni bang·a biaprangon ramarang namtokjaha, aro mitam street light-rangba kam ka·gija dongaha, indiba a·dokko ge·sa maniani matchotgijan gipin manianiko a·bachengatako nike tangka bang·a gita nikna man·aha.
NITI Aayog-ni Meghalaya-ko a·songo kangal on·batgiparangoni gngipa ranked on·genchimoba, sorkari kror-ni kror tangkarangko manianirangko ong·ate koros ka·enga.
A·dok sorkari mijao mangmang Shillong Cherry Blossom manianiko ong·atanio international-o mingsinggiparangko okamate tangka kror-ni kror-ko koros ka·aha.  Iako ong·aniko chu·ongnikjani gimin A·dok Sorkari, Me·gong Festival-koba ong·ate bang·en tangkarangko koros ka·taiaha, jeon bang·a mingsinggiparangko okamataha.
Sorkari ia manianirangko ong·ate tourism-ko nambatatrorona kam ka·enga ine ma·sina man·genchimoba, a·songo kangalbatgiparangoni gnigipa ong·genchimoba Meghalya maidake indakgipa dam rakgipa manianirangko ong·atna man·aha, ine sing·anirangba ong·katskaha.
BJP-ni palo agantimgipa M Kharkrang iani bidingo agana, ia festival ba manianirang  a·doko maming namroro silroroaniko ra·bagipa ong·ja.
Chinga, skia poraiani aro sana bananio gisikko on·batna nangenga, aro una bateba mongsongbatgipara a·dokni rating-ko tang·doatna kam ka·na nanga, ia manianirangko ong·atanira economy-ni bidingo kaketko pindapanisan ong·aia, aro indakgipa manianirangko ong·atanichi a·dokna maming namgnirang dongjawa,” ine Kharkrang aganaha.
Shillong Cherry Blossom aro Me·gong Festival baksanaba mitam Festival-rangko ong·atna mikkang, aro Sorkario da·ona kingkingba ia dam rakgipa festival-rango songregiparang songrebaha, uni gimin hisap dongkujaenga.
Meghalaya, a·songoni gnigipa kangal ong·batgipa a·dok ong·genchimoba, politician-rang namen man·e cha·giparang ong·a, aro Meghalaya-ni sak 12 cabinet minister-rang krorpatirang ong·a, mitam politician-ni man·e cha·ani giminde u·ina man·kuja.
CSWO-ni president, Agnes Kharshiing agana, ua an·tangsan ong·aija indiba bang·a manderangan indake dam rake koro ka·ani gimin sing·atanirangko daktokaha.
“Maidake finance department nie dongaha. A·dokni Hospital-na gamchatgipa bosturangko gipinonikosa biapna nangpilgenchimode, maidake manianirangko ong·atnara tangkarangko man·skaha.” Kharshiing, a·dokko tang·karangko jakalaniko ma·sina gita audit-ko ong·atako nangnikaha.
A·songo gnigipa kangalbatgipa a·dokni politician-rang an·tangni gamrangko on·na sikgenma, uni giminba nikna gita man·enga, aro uamangni Secretariat ba gipinrango  dam rakgipa garirangko aro dam rakgipa nokrango dongo donge an·senge dongakoba nikna man·aha.
Shillong-ni mitam ramarangni obostarang namja baksana mitam mongsonggipa rama sorokrangba namtokjaha, aro iani bidingo a·dok sorkari pangnan ma·mongniko dingtang dingtang project-rangko aro dakchakaniko bi·amna re·angsimna nangaha.