U·IATTIMGIPAONI
SHILLONG: Meghalaya a·doko dingtang dingtang ‘festival’-rangko ong·atanichi a·dok sorkari, bang·bea tangka paisarangko koros ka·engani gimin iandakgipa manianirangko ong·ate koros ka·ani pal, a·doko songdongenggipa mande sakantini namgninan chanchichina gita Congress dolni MLA aro Opposition dolni Chief Whip Saleng A Sangma, NPP-chi dilenggipa MDA sorkariko didiataha.
Iandakgipa a·dokni festival-rangona gipin a·songrangoni git ring·giparangko rimbaaniara nama ine janapatengon, iandake tangka paisarangko skatang koros ka·e roaigija festival-rangko ong·atanio kraa gita tangka paisarangko koros ka·china gitaba Sangma didiataha.
“Meghalaya a·doko ong·enggipa obostarangko niatgenchimode, chatro chatrirang scholarship-rangko man·tokkujaenga, mitam skigiparangba dormaharangko man·jaenga aro GHADC-o kam ka·giparangba ja 30 batpile dormaharangko man·tokkujaengani gimin an·chingni a·doko iandakgipa manianirangko ong·ate rona kraanian ong·jachim,” ine Gambegre-ni Congress MLA aganaha.
Garo Hills-o bang·bata manderangan, an·tangtangni man·gnirangko man·tokkujaengani gimin Krismaskoba kusi ong·e manipana man·jawa ine janapatengon, dingtang dingtang festival ba manianirangko Sonibar salo ong·atenga aro Robibarode giljarang bangbang ong·skaenga ine Sangma, suk ong·gijaniko parakataha.
Me·gong Festival-ode manderang tangka paisa nanggija indin napna man·engani giminsa manderang bang·bate sokenga ine janapatengon, Shillong-o Cherry Blossom festival-ko ong·ataniode sorkari, gong 3000-5000 ka·e ra·skaenga ine Sangma parakataha.
Me·gong Festival-ko ong·atanichi Garo Hills-o Tourism-ko tang·doatna man·genma ine sing·anina aganchakaniko on·angskaengon, salsa salgnina iandakgipa festival-rangko ong·ataianichide tourism-ko namdapatna man·jawa aro Garo Hills-ode iandakgipa manianirangko gisepode ong·atrongaia ine Opposition dolni Chief Whip aganaha.
Garo Hills-o tourism-ko tang·doatna gitade, homestay-rangko rikna loan ra·enggipa manderangna niamrangko taridapna nanggen maina bang·a chadamberangan homestay-rangko rikna loan ra·enggiparangko chotpilna gita man·tokjaenga ine Sangma parakataha.
