U·IATTIMGIPAONI
WILLIAMNAGAR: East Garo Hills a·jani dingtang dingtang biaprango donggipa chiring chibisikrang, pokkrirang aro warirangni sambao gital karkanarangko kulie ma·manti moilarangko aro jabol dakanirangko champengna gita East Garo Hills a·jani District Magistrate Vibhor Aggarwal, Section 144 CrPC-ko ra·gatangaha.
Ian karkanarangnasan ong·aigija jillarang, songadam nokadamrang aro manderangni dongchakgipa biaprangoni chiring chibisikrangona jabol watani aro ma·manti moila dakaniko champengna gita niamko ra·gataniba ong·enga ine u·iataha.
East Garo Hills a·jao chiring chibisikrangko rongtal an·tale rakkina aro iandakgipa chiring chibisikrango moila dakaniko champengna gita ta·raken ja·kurangko de·na nangengaha ineba District Magistrate parakataha.
