U·IATTIMGIPAONI
SHILLONG: Hynniewtrep National Liberation Council (HNLC) bobil dolko tom·tomaniona rimbapilna gita a·dok aro ma·mong sorkarirang agangrikaniko a·bachengatahaoba, HNLC bobil dolo gital membor-rangko rimnaptaiengaha ine koborrangko man·soahani gimin ia bobil dolko tom·tomaona rimbapilna gita gisiko nange agangrikchina Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala, sorkariko didiataha.
Pala-ni aganani gitade, a·dokni namgnina aro a·doko songdongenggipa manderangni namgnina ma·mong sorkari, a·dok sorkari aro HNLC bobil dolba ia agangrikaniko chu·sokgipa ong·atna gita gisiko nange mesokna nangenga.
A·doko tom·tomaniko ra·bapilna man·na gita HNLC bobil dolni gitcham chairman aro Mawhati-ni gitcham MLA Julius Dorphang-ko ku·baltitimgipa dake jakkalchinaba ua a·dok sorkarina ku·pattianiko on·ataha.
Me·chik bi·sako drae til·ekani gimin Dorphang-ko rim·e pattoko donatahachim ine nikna man·a.
“Bobil dol baksa agangrikanio sorkari gisiko nangna nangenga aro ia bobil dolo gital membor-rangko rimnaptaina on·na nangjaha. Bobil dolni je manderang gipin a·songrango dongengachim, uamang pilakkon a·dokona rimbapilna nanga,” ine Pala aganaha.
Salgro salaram jolni Nagaland, Assam, Manipur aro uandakgipa biaprangoba apsan dakgipa obostarangkon nikna man·enga ine janapatengon, salgro salaram jolrango so·sojengjeng ong·anirangko namatna gita ma·mong sorkari gisik nangteljaenga ine MPCC-ni president matnangataha.
Pala-ni aganani gitade, bobil dake chakatgipa dolrangni ong·katani ja·pang ja·dilkon sorkari sandina gita nangenga maina dingtang dingtang bobil dolrang baksa songgigrikanirango soi ka·grikani ja·manoba gital dake bikottaigipa bobil dolrang salgro salaram a·dokrango ong·katkuaiengachim.
