U·IATTIMGIPAONI
SHILLONG: 2024 bilsioni Meghalaya a·doko class 1-oni class 10-ona National Council of Educational Research & Training (NCERT)-ni textbook-rangko ra·gatgnok ine sorkarini parakataoni jasa ja·man gital textbook-rangni bimingrangko Meghalaya Board of School Education (MBOSE) parakataha.
Ia gital textbook-rangko 2024 bilsi dipet Class 1-oni class 10-ona MBOSE-chi chalaienggipa pilak Lower Primary, Upper Primary aro Secondary skulrango jakkalanggnok.
NCERT-ni textbook-rangko chapa ka·na aro supply ka·na gitaba November jaon MBOSE, expression of interest-ko on·manahachim ine nikna man·a.
Meghalaya a·doko class 1-oni class 10-ona NCERT-ni textbook-rangko jakkalna tik ka·aniko a·dokni bang·bata opposition dolrangan jegaltokahachim ine nikna man·a.
NCERT-ni textbook-rangko ra·gatna skang, dingtang dingtang dolrang baksa aro mongsongbate skigiparang baksa agangrikchengchina gita Voice of the People’s Party (VPP) dolba, a·dok sorkariko didiatahachim ine nikna man·a.
“Skulrango textbook-rangko namdapatna ja·kurangko de·engani gimin sorkariko mittelpilenga indiba dingtang dingtang dolrang baksa, mongsongbate skigiparang baksa maming chanchirimchengani gri rang·gitik NCERT-ni textbook-rangona apjitaniara ong·gija ja·ku de·anisa ong·enga,” ine VPP-ni spokesperson Batskhem Myrboh aganahachim.
Meghalaya a·dokni skulrango class 1-oni class 10-ona NCERT-ni textbook-rangko ra·gatna sorkarini miksonganiara da·o aro mikkangchiba manderangoniko ra·seke ra·ani gitasa ong·gnok ine a·dokni gitcham chief minister aro Trinamool Congress (TMC) parliamentary party-ni president Mukul Sangma-ba parakatahachim aro a·doko NCERT-ni textbook-rangko ra·gatjachina a·dok sorkariko didiatahachim.
Uni chief minister ong·engmiting somoio ia apsan dakgipa proposal-kon uona ra·baahachim ine gisik ra·atpilangengon, “Na·simango board donga ong·ode maini gimin gipinrangna bate syllabus-ko nambate tarina man·jaenga? A·doko NCERT textbook-rangko ra·gatna aganeba na·simang Khasi aro Garo ku·sikrangko Constitution-ni Eighth Schedule-o napatna gita dabienga. Ki·tap segiparang an·chingo dongpileba NCERT-ni tarigimin ki·taprangkosa na·simang brena nangnikenga?,” ine Sangma, a·dok sorkariko sing·doatahachim.
