U·IATTIMGIPAONI
SHILLONG: Bilsiantian Krismas aro Bilsi Gitalni salrango manderang churing chupeke gari gorarangko salani a·sel ramarango kragija dake a·sel ong·anirangko aro manderangni janggirangko gimaatna nangrongengani gimin da·o bilsi gitalko maniani somoirangoba police-rang, churing chupeke gari gora salanirangko bilakbate nirokna tik ka·angaha.
East Khasi Hills a·jani Superintendent of Police (Traffic) K Prasad-ni u·iatani gitade, bilsi gitalko manianio kragija dake a·sel ong·anirangko komiatna gita police-rang, Shillong songjinmani dingtang dingtang ramarango bilakbate nirok sandianirangko dakanggen aro ramarango churing chupeke gari gora salanirangko rim·a man·genchimode gong 10,000 tangkako dai dake ra·an baksana Motor Vehicles Act-ni Section 185-o pangchake rakgipa sastirangko on·gen.
“Shillong Traffic Police (STP)-ni gita chinga mongsongbate churing chupeke aro skatang gari gora salaniko bilakbate nirokanggen aro niam pe·giparangko rim·a man·ode, gong 10,000 daiko gaman baksana komibeoba jadok ba una bate pattoko donatani sastirangko man·gen. Pangna bilsian Krismas aro Bilsi gitalko maniani somoirango skatang gari gorarangko salanichi ramarango a·sel ong·anirangko nikna man·rongengani gimin police-rang bilakbate nirokna tik ka·aha,” ine East Khasi Hills a·jani SP (Traffic) parakataha.
Prasad-ni u·iatani gitade, December-ni 31 aro January-ni 1 tarikrango police-rang, gari gora salgiparangko bilakbate nirokanggen.
Krismasko maniani somoioba police-rang, gari gora salgiparangko nirokangenba, churing chupeke gari gora salgipa manderangko bang·en rim·na man·ahachim.
