U·IATTIMGIPAONI
SHILLONG: Meghalaya a·dokona bostu salgipa rel garirangko ra·bana nanga ine agananiara United Democratic Party (UDP)-ni general secretary Jemino Mawthoh-ni an·tang chanchianiko agananisan ong·aia ine Sonibar salo UDP talataniko on·angaha.
UDP-ni working president Titosstar Chyne-ni parakatani gitade, a·dokona bostu salgipa rel garirangko ra·bana nanga ine UDP-ni general secretary Jemino Mawthoh-ni agananiara ua an·tangni chanchianiko agananisan ong·aia aro iako UDP dol gimikni chanchiani inede ra·na man·jawachim.
Khasi aro Jaintia Hills a·jarangona rel garirangko ra·baani bidingo da·o dipet UDP-ni gitade chanchirima dongkuja ineba Chyne talataniko on·angaha.
“Rel garirangko ra·baani bidingo UDP-ni gita chanchianiko jinmana parakatna skangde chinga apsan chanchirimchengna nanggen,” ine UDP-ni working president aganaha.
Chyne-ni parakatani gitade, a·dokona rel garirangko ra·bana skang niam gri napsrukanirangko champengna gita rakgipa niamrangko ra·gatchengna nanggen ine a·bachengonin UDP aganmanahachim.
KHADC-ni chief executive membor (CEM) ong·engmiting somoiba ua Khasi aro Jaintia Hills a·jarangona mande salgipa ba bostu salgipa rel garirangko ra·bana gita NOC-ko on·jawa ine aganmanaha ineba Chyne parakataha.
“Iandakgipa kamrangni bidingo maming ja·kurangko de·na skangba an·ching name chanchichengna nanggen,” ine ua aganaha.
Meghalaya a·dokona bostu salgipa rel garirangko ra·baanichi a·dokni manderangan namgni ong·gen ine adita salrangna skangsan UDP-ni general secretary Jemino Mawthoh, bostu salgipa rel garirangkode ra·chakchina gita dingtang dingtang dolrangko didiatahachim ine nikna man·a.
“An·ching gimikankode jegale dongna man·jawa aro chinga bostu salgipa rel garirangkode nangnikenga. A·doko songdongenggipa manderangna mai nambatgen ukoba an·ching nina gita nanggen maina re·a doani kolrangko namdapatanichi an·ching songni nokni manderangna bading chiwale cha·anio bang·en namgnirangko ra·bana man·gen,” ine UDP-ni general secretary Jemino Mawthoh, a·dokona rel gari ra·baaniko dingtang dingtang dolrangni jegaltokengani gimin aganahachim.
