TURA: 2018 bilsio Jharkhand a·doko Maoists bobil dolko warachakna gita an·tangko on·kange kamko ka·engmiting somoio bobil dolni jako so·ota man·gipa sipai saksani ma·a paako adita salrangna skang, Central Reserve Police Force (CRPF) dolni gita mande ra·pilskaaniko dakangaha.
CRPF sipai dolni ning·o donggipa 209 CoBRA dolni Utpal Rabha, 2018 bilsini July 6 tariko Maoists bobil dolni manderangko warachakengmiting somoio so·otako man·ahachim. Ua, North Garo Hills a·jani Bajengdoba Police Station-ni ning·o donggipa Thorikapara songoni ong·achim.
Indake ong·engon, sianggipa sipai Utpal Rabha sagiko gisik ra·na gita January-ni 1 tariko 120 Bn CRPF-ni Assistant Commandant Sudhir Kumar aro gipin gadangni officer-rang, sianggipa sipaini pagipa Brojendro Rabha aro ma·gipa Bakhowa Rabha-na dingtangmancha cha·anirang aro gipin boksisrangko on·e mande ra·pilskaaniko dakangaha.
