SHILLONG: Chatro chatrirangna scholarship-ko on·aniara ma·mong sorkarini ra·gatgipa program-sa ong·ani gimin ia kamo a·dok sorkaride bang·e bil dongja indiba scholarship-rangko uamang somoi gita on·na jotton ka·enga ine Robibar salo, a·dokni Education Minister Rakkam A Sangma talataniko on·ataha.
“Ian ma·mong sorkarini program-sa ong·ani gimin chingni jakode chu·gimil bilrang dongja indiba scholarship-rangko ta·raken on·na gita chinga an·tangni gitade jotton ka·enga,” ine Sangma aganaha.
2023-24 bilsini scholarship-ko chatro chatrirang man·tokkujaengani gimin adita salrangna skangsan, North Eastern Hill University Students Union (NEHUSU) aro Hynniewtrep Youth Council (HYC) dolrang, sorkarini kosako jegalaniko mesokna gita Shillong songjinmani MBOSE office a·palo jinma jingjengatanirangko dakangenba, sal 10-ni gisepo chatro chatrirangna scholarship-rangko on·jagenchimode sorkarini kosako bilakbate jingjengatanirangko dakanggen ine mikrakataniko on·angahachim.
Indake ong·engon, scholarship-ko man·na nangenggipa sak 67, 260 chatro chatrirangoni sak 37, 406 chatro chatrirangnade ma·mong sorkarini skanggipa instalment-o chamatgipa gong kror 52 tangka paisarangchi on·na man·aha aro da·o bangki dongenggipa chatro chatrirangna scholarship-ko on·na gita ma·mong sorkarioni watatna sienggipa gong kror 65 tangkarangna a·dok sorkari sengkuenga ine Education Minister parakataha.
