SHILLONG: Ia bilsini gisepo ong·atna sienggipa Lok Sabha election-o Bharatiya Janata Party (BJP)-ni candidate-rang, Meghalaya a·dokni damgni parliamentary constituency-rangon chegenchimode ma·mong sorkarini on·enggipa namgnirang man·bae a·dokna bang·en namgni ong·gen ine BJP-ni dilgiparang parakataha.
Meghalaya BJP-ni ku·wattimgipa Mariahom Kharkrang-ni parakatani gitade, BJP membor-rang ba seoka man·gipa BJP MP-rangni bi·anirangko ma·mong sorkari chu·sokate on·na gisiko nangaigen aro ian Meghalaya a·doknaba bang·en namgni ong·genchim.
Meghalaya a·dokni damgni Lok Sabha seat-rango susana sienggipa BJP candidate-rangni gimin sing·on, iani bidingo a·dokni dilgiparang, ma·mongoni u·iatanina sengkuenga ine Kharkrang parakataha.
Shillong Lok Sabha constituency-o susana kusi ong·enga ine Cabinet Minister AL Hek-ni agangipani gimin sing·anina aganchakskaengon, iani giminde maming agangrikanirang dongkuja indiba pilakan BJP-ni high command-osa pangchakaigen ine BJP-ni state spokesperson parakataha.
Lok Sabha election-o me·chik candidate-ko susaatgenma ine sing·skaon, election-o chenagipa candidate-kosa uamang skanggipa nichenggen aro bimingrangko ma·mong BJP-ona watatgen ine Kharkrang aganaha.
Tura Lok Sabha seat-ni gimin janapatskaengon, da·o dipet uamang darangkoba party tikitna dorgasto galani gimin knasoa dongkuja indiba songbadrangonikosa saksani bimingko knakuenga ine Kharkrang parakataha.
Tura Lok Sabha constituency-o susana gita party tikitko on·genchimode susana kusi ong·aigen ine adita salrangna skangsan, Tura-ni MDC aro BJP-ni state vice president Bernard Marak parakatahachim.
