SHILLONG: National Highways and Infrastructure Development Corporation Limited (NHIDCL)-ni kam ka·ani bewalna a·dokni Deputy Chief Minister aro PWD (Roads) Minister Prestone Tynsong, suk ong·gijaniko parakataha aro NHIDCL-ni kosako Joint Action Committee (JAC)-ni jingjengatanioba chakpaaniko parakataha.
Meghalaya a·doko Shillong-Dawki rama baksana dingtang dingtang ramarangko NHIDCL jako ra·e tariengachim ine nikna man·a.
“Anga NHIDCL-ni official-rang baksa chang 100 batpile tom·e agangrikaha aro anga NHIDCL-ni kam ka·ani bewalrango kusi ong·ja,” ine Tynsong aganaha.
Tynsong-ni aganani gitade, Assam a·dokoba apsan daken NHIDCL-ni kosako badi ka·tokengachim.
Shillong-Dawki ramani pilak bakbrikon a·dok sorkari, somoi gita matchotatna nangnikengachim ine janapatengon, “Anga NHIDCL-ni official-rangko agangrikna okamtaigen. NHIDCL-ni kamrang namen ka·sinengani gimin Synjuk Ki Rangbah Shnong aro mitam NGO-rang jingjengatahani gimin anga an·tangba namnikpaa,” ine Tynsong parakataha.
Budbar salosan JAC-ni membor-rang, gipin dolrang aro jatni dilgiparang baksa NHIDCL-ni office-ona napdraangenba, Shillong-Dawki project-ni Phase IV ning·o donggipa Pynursla-Dawki ramani bakko ta·raken tarina a·bachengatjagenchimode Public Interest Litigation (PIL)-ko ka·doanggen ine ka·mikkenataniko on·angahachim.
Koborko on·ani gitade, 2018 bilsioni NHIDCL-ni jako ra·gipa ming 17 project-rangoni mingsakoba da·onan matchotkujachim. Ia project-rangko dingtang dingtang bak dake suala aro ia project-rangni damara gong kror 7,195-na batpilachim.
