TURA: South Garo Hills a·jani Gasuapara Block ning·o donggipa Wagebokgre aro Attabenga songrango Rashtriya Madhyamik Shiksha Abhiyan (RMSA) skul nokrangko rika da·onan matchotkujaenga ine Baghmara-ni A·chik Holistic Awakening Movement (AHAM), South Garo Hills a·jani official-rangna badi ka·doangaha.
Iani bidingo AHAM Baghmara unit-ni dilgiparang, South Garo Hills a·jani Additional Deputy Commissioner (ADC), District Sub-Division School Inspector (Primary I/c), DSEO aro DRDA-ni Project Director-ko grongenba, badi ka·doangaha aro ta·raken am·sandianirangko dakchina didiangaha.
Iana skang, AHAM Baghmara unit-ni dilgiparang, Wagebokgre songona re·angenba, ia skul nokko nieaha ine u·iataha.
“Jolo songdongenggipa manderangni chingna aganani gitade, Wagebokgre songo rikenggipa RMSA skul nokko 2021 ba 2022 bilsion matchotani ong·achim maina Gasuapara block-ni ning·o donggipa Telekali songoba RMSA skul nokko apsan bilsion rikna a·bachenge, ru·uta somoirangna skangan matchotahachim,” ine AHAM Baghmara unit-ni dilgiparang parakataha.
Indake ong·genchimoba, Wagebokgre songo rikenggipa RMSA skul nokko da·onan matchotkujaenga aro kamrang namen ja·manchakenga ine AHAM-ni dilgiparang parakataha.
“Skul nokko rika matchotkujaengani a·sel skulko name chalaina man·kujaenga aro class-rangkoba ra·na man·kujaenga,” ine AHAM Baghmara unit-ni dilgiparang parakataha.
Ia song damgnini skul nokrangko ta·raken matchotatchina u·iatengon, skul nokrangko somoi gita matchotatja ong·ode rakbata ja·kurangko de·anggen ine AHAM mikrakataniko on·angaha.
