TURA: Ru·uta bilsirangna Rongjeng jolo songdongenggipa manderangni ka·dongbee nichakenggipa Rongjeng Model Degree College-ko ia bilsionin je cholchiba academic session-ko a·bachengatchina gita Niksamso Garo Community Organisation (NGCO) aro Garo Students Union (GSU) Rongjeng unit dabiangaha.
Iani bidingo NGCO aro GSU Rongjeng unit-ni membor-rang, Meghalaya a·dokni Education Minister Rakkam A Sangma-ko grongenba memorandum-ko on·angaha aro ia Rongjeng Model Degree College-ko je cholchiba ia bilsionin a·bachengatchina gita didiangaha.
“Rongjeng Model Degree College-ko ia bilsian name nirokenba, je nanga kamrangko taridape on·enba academic session-ko a·bachengatchina chinga Education Minister-ko mol·molaha aro ua chingni dabiani gitan matchotna nanggipa kamrangko matchotate, session-ko ia bilsion a·bachengatna ku·rachakaniko on·ataha,” ine NGCO aro GSU Rongjeng unit-ni dilgiparang parakataha.
Indake ong·engon, Education Minister-ni ku·rachaka gita Rongjeng Model Degree College-ko ia bilsioni a·bachengatna man·jagenchimode uamang rakbata ja·kurangko de·anggen ineba NGCO aro GSU Rongjeng unit-ni dilgiparang mikrakataniko on·angaha.
Rongjeng Model college-ko ia bilsionin a·bachengatchina NGO-rang dabia
Date:
Share post:
