SHILLONG: Meghalaya Legislative Assembly-ni Rules of Procedure aro Conduct of Business-o pangchake a·dokni Governor, Assembly-o Hindi ku·sikchiba aganprakna bil dongaia.
Assembly Secretariat official saksani u·iatani gitade, Assembly-o a·dokni Governor, English ku·sikna agreba gipin ku·sikrangchiba aganprakna man·aia aro uni Hindi ku·sikchi aganprakaniko champengna gita Assembly-o niamrang dongja.
Meghalaya a·dokni Governor, Assembly-ni session-o English ku·sikna agre gipin ku·sikrangchi aganprakgenchimoba, uni aganprakaniko Assembly-o dongpae pe·timna gitade niamrang dongskaja ine Secretariat official talataniko on·angaha.
Governor-ni aganprakaniko Assembly-o dongpae pe·timna gita niamrang dongjani gimin ua Hindi ku·sikchi aganprakgenchimoba, session-na skangan uni aganprakaniko chapa ka·e, Assembly-ni membor-rangna sualskana man·a ineba official parakataha.
“Governor-ni aganprakenggipa copy-ko membor sakantian man·engani gimin maming gimaani dongjawa aro Governor-de una see on·giminonikosan poraiataigen,” ine Assembly Secretariat-ni official aganaha.
Assembly-ni niamo pangchake, membor-rangba an·tangtangni ku·sikchi aganprakna man·aia indiba uamang, an·tangtangni aganprakaniko English ku·sikchi seskaenba, session-na skangan membor-rangna sualna gita nanga ineba ua official parakataha.
Re·baenggipa February-ni 16 tariko, Meghalaya Legislative Assembly-ni budget session-ko a·bachengatanio, a·dokni Governor, Hindi ku·sikchi aganpraktaigenchimode, uni aganprakanio bak ra·jawa ine adita salrangna skangsan, Voice of the People’s Party (VPP)-ni membor-rang parakatahachim ine nikna man·a.
Re·anggipa 2023 bilsini Budget Session-ko a·bachengatani somoioba, a·dokni Governor, Hindi ku·sikchi aganprakahani gimin ian joltangni membor-rangko chonnikani gita ong·aha ine matnangenba, VPP-ni MLA sakbri, session-oni ong·kate katahachim.
Budget session-ko a·bachengatanio English ku·sikchi aganprakna nanganiko seachi Assembly Speaker-na u·iatengon, Hindi ku·sikara Meghalaya a·dokni official language ong·ja aro re·anggipa bilsioba a·dokni Governor, Hindi ku·sikchi aganprakahani a·sel bang·a membor-rangan ma·sitokjae neng·nikanirangko chagrongna nangtokaha ine VPP Parliamentary Party-ni secretary Heavingstone Kharpran parakatahachim.
Budget Session-ko a·bachengatanio Governor-ni aganprakaniko English ku·sikchi dakatchina gita Assembly Speaker-ko didiatengon, a·dokni Governor, English ku·sikchi aganprakna man·jaode uni Hindi ku·sikchi aganprakaniko English ku·sikchi pe·timatskachina gita VPP parliamentary party-ni secretary didiataha.
Budget Session-ara Assembly-ni pilak membor-rangnan namen nangchongmotgipa session ong·ani gimin membor sakantini ma·sigipa ku·sikchisa aganprakna nangchongmota ineba VPP didiatahachim.
