SHILLONG: Ia 2024 bilsini Meghalaya Games aro Khelo India Youth Games 2024-o chegiparangna Sombar salo, dingtangmancha a·dok sorkari, Shillong songjinmani U Soso Tham Auditorium-o mande ra·pilskaaniko dakangaha aro ia tom·anio a·dokni Chief Minister Conrad K Sangma baksana, a·dokni Health Minister Ampareen Lyngdoh, Sports Minister Shakliar Warjri aro dingtang dingtang official-rangba bak ra·angtokaha.
Ia program-ko ong·atanio, Meghalaya Games 2024-o chegiparangna aro Khelo India Youth Games 2024-o medal chebagiparangna a·dok sorkari, mande ra·pilskaani chin gita dingtangmancha gong lak 88.63-ni cheque-rangko suale on·ataha.
Dingtang dingtang kal·susaanirango chegiparangna mande ra·pilskaaniko dakanganio a·dokni Chief Minister, jinmana aganprakangengon, ia kal·susaanirango chegiparangna mittelpilaniko parakangenba, uamangni a·dokna mikkim rasong ra·baaniko jinma kusi ong·e manina nangchongmota ine aganangaha.
“Ia antiara namen dingtangmanchagipa anti ong·enga aro ia anti gimik an·ching kal·susaani, bading chiwalani, doka dam·ani aro pilak kamrango chu·sokgipa chadamberang baksa kusi ong·e manianggen,” ine Sangma aganaha.
Dingtang dingtang kamrango chadambeskarangko didina gitasa da·alo dingtang dingtang kal·susaanirango chu·sokgipa chadamberangna sorkari, mande ra·pilskaaniko dakenga ineba ua aganaha.
Ia bilsio ong·atanggipa Meghalaya Games-ko chu·sokgipa ong·atna man·ahani gimin Meghalaya Sports Olympics Association (MSOA) aro dingtang dingtang sports association-rangko mittelpilangengon, iandakgipa kal·susaanirangko ong·atanio ra·bianirang donggenchimoba dingtang dingtang dolrang baksa nangrime kamko ka·anichi iandakgipa kal·susaanirangko nambate ong·atna man·enga aro dingtang dingtang neng·nikanirangko mikkangchakna man·enga ine Chief Minister parakataha.
Khelo India Youth Games-ni robol kal·susaanio chegipa ong·e a·dokna mikkim rasongko ra·baahani gimin robol kal·gipa dolko mittelpilangskaengon, ian a·doko changgipa sapgipa manderang bang·en donga ine mesokani ong·a aro miksongani baksana gisiko nange kamko ka·genchimode chu·sokaniko man·a ama ine mesokaniba ong·a ine Sangma parakataha.
Ia tom·anio a·dokni Sports Minister Shakliar Warjri-ba jinmana aganprakengon, an·tangtangni man·gipa boksisrangchi, an·tangtangni kal·susaanirangko namdapatna jakkalchina gita kal·susagiparangko didiangaha.
