SHILLONG: Shillong songjinmara Meghalaya a·dokni skotong songjinma ong·genchimoba, bang·bata biaprangon street light ba ramarango teng·atna dongimin light-rang teng·aniko on·jaengani a·sel manderang neng·nikanirangko chagrongna nangtokenga aro ia songjinmakon a·songo ‘andalbatsranggipa skotong songjinma’ ine mingnaba man·enga.
Shillong songjinmani street light-rangko re·roroe nigenchimode, bang·bata biaprangon ia street light-rangni teng·gija donganikosa nikna man·aia aro ian Shillong songjinmani ramarango teng·aniko on·na gita sorkarini gisik nanggijaniko mesokani gitaba ong·enga.
Shillong songjinmani bang·bata ramarangon street light-rangko donahachim indiba ia street light-rang changsa siahaode ia street light-rangko taripilna gita ru·uta somoirangko nangskaengachim.
Shillong songjinmani dingtang dingtang biaprango songdongenggipa mitam manderangni parakatani gitade, a·dokni minister-rang aro sorkari officer-rangni dongchakenggipa Secretariat aro Camel Back road jolrangosan street light-rangko name nirokenga indiba gipin biaprangode maming nirok sandianirang dongsrangjachim.
“Meghalaya a·dokni skotong Shillong songjinmaon street light-mangmangkoba sorkari name chalaina man·jaenga,” ine songjinmao songdongenggipa mande saksa suk ong·gija aganaha.
Shillong songjinmani bang·bata biaprangon walni somoirango andalani gimin gipin biaprangoni re·baenggipa tourist-rang aro a·doktangni manderangba walni somoiode ong·katnan kentokenga ineba ua aganaha.
Koborko on·ani gitade, Shillong songjinmani badiaba badiaba ramarango street light-rangko MeECL nirokenga aro mitamkode Urban Affairs department-sa nirokengani gimin street light-rangko name chalaianio neng·nikanirangkoba chagrongna nangenga.
