BAGHMARA: South Garo Hills a·jani Rongara jolo donggipa Gulpani Nokat songo gital rikgipa Jackfruit Processing Unit-ko Bristibar salo, a·dokni Chief Minister Conrad K Sangma, kulie on·angaha aro ia processing unit-ko kulie on·anganio, a·dokni Education Minister Rakkam A Sangma, Baghmara-ni MLA Kartush R Marak, Amlarem-ni MLA Lahkmen Rymbui, GHADC-ni Chief Executive Membor (CEM) Albinush Marak aro gipin dilgiparangba dongpae bak ra·angaha.
Ia Jackfruit Processing Unit-ko kulie on·angani somoio Chief Minister-ni parakatani gitade, te·brong nangkari somoio salantian songni manderangoniko gong lak 1.5-oni gong lak 2-mangni gita te·brongrangko bree ia processing unit-o te·brong chips, te·brongni moida, te·brong jam aro uandakgipa ma·manti cha·ani bosturangko tarigen aro iana dingtangmancha sak 150-mangni gita me·chikrangna skie on·enba kamo rakkigen.
Iandakgipa processing unit ba karkanarangko te·brongnasan ong·aigija songo noko man·gipa ma·manti bolam bite, me·su samjak aro gipin bosturangoniko dingtang dingtang bosturangko tarina gitaba sorkari kam ka·enga ineba Sangma aganaha.
“Meghalaya a·doko somoini kri dingtang dingtang bolam bite aro me·su samjakrangko man·engoba manderang iarangoniko an·tangtangna man·dapanirangko tarina man·jaengani a·sel, songo noko man·gipa bolam bite aro me·su samjakrang indin so·e bon·rongaia. Iani giminsa sorkari, game ge·e cha·enggipa manderangni man·gniko bariatna gita dingtang dingtang program-rangko a·bachengataha aro sorkarini a·bachengatgipa dingtang dingtang mission-rang, jekai Lakadong Mission, Ginger Mission, Jackfruit Mission aro uandakgipa program-rangchi songo noko manderangna janggi tangani cholrangko on·enga,” ine Chief Minister aganaha.
Chief Minister-ni parakatani gitade, gong crore 2-mang koros ong·e rikgipa ia Jackfruit Processing Unit-ko 100 KW solar power unit-chisa chalaiani gimin ian ong·telaigipa bilko jakkalna cholrangkoba on·enga.
Ia processing unit-ko Rongara Agro Food Processing Cooperative Society chalaigen aro ian South Garo Hills a·jani sak 5000-mangni gita game ge·e cha·giparangna namgni ong·an baksana jolni chadamberangnaba kamrangko ka·e cha·na cholrang ong·gen ineba ua aganaha.
