TURA: Rongara-Siju constituency-ni ning·o donggipa dingtang dingtang sorkari skul nokrangko taridape on·anirang dongjae aro rama jal·langrang dongjani a·selo poraienggipa chatro chatrirang neng·nikanirangko chagrongna nangtokenga ine BJP Meghalaya-ni state vice president aro Tura-ni MDC Bernard N Marak parakatenba, chatro chatrirangni namgnina ia skulrangko taridapchina aro rama jal·langrangko tarie on·china gita jolni MLA aro a·dokni Education Minister Rakkam A Sangma-ko didiataha.
“Lekka poranian sorkarini mongsonggipa daito ong·ani gimin aro na·a an·tangan a·dokni Education Minister ong·engani gimin nang·ni Rongara-Siju constituency-ni ning·o donggipa skulrangni gimin aro ua jolrango poraienggipa chatro chatrirangni neng·nikanirangko nang·na u·iatna nangnikenga. Re·anggipa antiosan anga Rongara-Siju constituency-ona re·ange manderang baksa agangrikon, ia jolrango bang·bata sorkari skulrangan obosta namsrangjaha ine songni manderang angna u·iataha. Manderangni angna aganatani gitade, bang·bata skul nokrangan nokking grisa chalaienga aro skulo paikanarang, chirangrangba dongja. Skul nokrango do·garang, black board-rang aro asongchakani bench-rangba dongja aro bang·bata somoirangon skul nokrango do·bokrangsa ma·chaktokenga. Badiaba badiaba biaprangode 2022 bilsini chi bananio pe·anggipa jal·langrangkon da·onan taripile on·kujaengani a·sel chatro chatrirang, skulrangchi re·anio neng·nikanirangko chagrongna nangtokenga. Chatro chatrirang gimikande chi jrona changgiparang ong·jani gimin chirangko bate skulrangchi re·anio uamangni janggirangna kenchakna nanganirangba ong·enga,” ine Marak parakatenba, Rongara-Siju constituency-ni ning·o donggipa sorkari skul nokrangko ta·raken rike on·china aro rama jal·langrangko tarie on·china jolni MLA aro Education Minister-ko didiataha.
PM Poshan Mid Day Meal-ni ning·o skulni bi·sarangna on·enggipa merongrang namgijakosa on·enga ine matnangatengon, skulo poraienggipa bi·sarangni aro skigiparangni namgnina merong namakosa on·china gita Marak, Education Minister-ko didiataha.
Skigiparangni dormaharangko somoi gita on·china didiatengon, skigiparangna dormaharangko somoi gita on·genchimode sorkari skulrangoba lekka porani gadangrang dingtangbana gita man·chongmotgen aro ian chatro chatrirangna namgni ong·gen ine Marak, an·tangni ka·dongchakenganiko parakataha.
Chatro chatrirangni man·na nangenggipa scholarship-ni bidingo janapatskaengon, chatro chatrirangni neng·nikanirangko da·alonan sorkari namatna man·kujaenga ine BJP Meghalaya unit-ni state vice president parakatenba, iani bidingo committee-ko songchina aro chatro chatrirangna uamangni scholarship-rangko man·na gita dakchakchina Education Minister-ko didiataha.
Gital text book-rangko ra·gatani bidingo janapatskaengon, “Ia gital ki·taprangko chapa ka·na gita chapa ka·chakram biap donggijagipa dolsana chapa ka·ani kamko pakwataha ine anga kobor man·soaha aro ian kakket ong·bebegenchimode angna talataniko on·china anga nangnikenga,” ine Marak parakataha.
