TURA: West Garo Hills a·jani Phulbari jolo donggipa Bamundanga-Nolbari jolrango niam gri ita so·gipa karkanarangko chalaiengani a·sel songni nokni manderang neng·nikanirangko chagrongna nangtokenga ine ADE, GSMC aro GSU dolrang parakatenba, ia ita so·gipa karkanarangko chipatchina Hollaidanga-ni range forest officer-na sedoataha.
Iani bidingo forest official-na sedoatengon, Bamundanga aro Nolbari songni gisepo baditaba dam ita so·ani karkanarangko niam gri chalaienga aro ian songni nokni manderangna namgijaniko ra·baenga ine dolgittam NGO-rang parakataha.
“Ia jolrango ita so·gipa karkanarangko baditaba dam kulie chalaiengani a·sel manderang rang·sitanio neng·nikanirangko man·na a·bachengtokengaha. Ia ita karkanarango bolrangko so·engani a·sel sambao donggipa songrangona wal·kurang jokange manderang neng·nikanirangko man·tokenga. Uni gimin ia ita so·gipa karkanarangni kosako ta·raken ja·kuko de·china chinga nangnikenga,” ine GSU Chibinang unit-ni president Amit Marak parakataha.
Bamundanga-Nolbari jolmangmangon komibeoba damsku ita so·gipa karkanarang donga ine janapatengon, West Garo Hills a·jani a·kawe jolrango komibeoba dam 100-na baten ita so·gipa karkanarang donga ine dolgittam NGO-rang parakataha.
A·kawe jolrango ita so·gipa karkanarangko chalaiengani a·sel manderang neng·nikanirangko chagrongna nangtokenga ine badi ka·anirangko man·soahani gimin niam gri ita so·gipa karkanarangko champengna gita adita salrangna skangsan West Garo Hills a·jani District Administration Section 144 CrPC-ko ra·gatangahachim ine nikna man·a.
Section 144 CrPC-ko ra·gataoni da·o antigni batangpilengahaoba ia jolrango niam gri chalaienggipa ita karkanarangni kosako maming ja·kurangko de·skakujaengachim.
