SHILLONG: 2023-2024 bilsio Chief Minister’s Youth Development Scheme (CMYDS)-ni kamrangna gong kror 5 lak 50 tangkarangko sorkari chame on·aha.
Iako Mongolbar salo, Assembly-ni budget session-o sing·anirangna aganchakaniko on·anio, a·dokni Sports & Youth Affairs Minister Shakliar Warjri parakataha.
Warjri-ni parakatani gitade, Shillong aro Tura-ni deputy commissioner-rangna gong lak 30-ko chamenga aro bangki dam 10 a·jarangna gong lak 17 ka·e chamskaenga.
Ia scheme-ni ning·o constituency damprakna tangka paisa chamaniko sorkari nipilna miksonganirang dongama ine Mawhati-ni Congress MLA Charles Marngar-ni sing·anina aganchakaniko on·angskaengon, ia scheme-ni tangka paisarangkode constituency-ni gita ong·ja indiba a·jatangtangni deputy commissioner-o badita club-rang ba dolrang register ka·a uno pangchakesa tangkarangko chamaha ine Sports & Youth Affairs Minister parakataha.
Ia scheme-ko MLA-rang gitaba on·na man·genma ine Nongkrem-ni VPP MLA Ardent Miller Basaiawmoit-ni sing·anina aganchakaniko on·angskaengon, ia scheme-kode a·jatangtangni deputy commissioner-rang aro Sports & Youth Affairs Directorate gitasa on·enga ine Warjri parakataha.
