SHILLONG: Lok Sabha-ni gitcham Speaker aro Meghalaya a·dokni gitcham Chief Minister PA Sangma sagini changchetgipa siani salko maniani bak gita re·anggipa Sombar salo, dingtangmancha University of Science & Technology Meghalaya (USTM)-o PA Sangma Memorial Lecture-ko ong·atangaha aro ia memorial lecture-ko Meghalaya a·dokni gitcham Governor RS Mooshahary on·angaha.
Ia program-ko ong·atanio, USTM-ni Chancellor Mahbubul Hoque, Vice Chancellor Prof GD Sharma, university-o kam ka·giparang, skigiparang aro chatro chatrirangba bak ra·angtokaha.
Ia PA Sangma Memorial Lecture-o Mooshahary, jinmana aganprakengon, PA Sangma sagiko Northeast ba a·songni salgro salaram jolni ‘mikkang’, saksa mingnamgipa politician aro an·tangni kamo on·kanggipa ine toe aganangaha.
“Uni chu·sokbatsranggipa kamrangoni mingsade uni dedrangba ugitan skia man·giparang ong·a. Uni depante Conrad Sangma-an India a·songo skia man·batsranggipa chief minister ong·a,” ine ua aganaha.
Mooshahary-ni aganani gitade, party politics-ni a·selsa PA Sangma sagi, a·songo chubatsranggipa kam minggni, chong·motan President aro Prime Minister-ni kamrangko bang·gijachi man·rikjaha.
“Da·alo Meghalaya a·dokko PA Sangma gita dakgipa dilgiparangni giminsa mingsing minggamenga,” ine ua aganaha.
Ia program-ko ong·atanio, USTM-ni Chancellor Mahbubul Hoque-ba jinmana aganprakengon, 2008 bilsio USTM Act-ko Meghalaya Assembly-o pass ka·anio PA Sangma sagian mongsonggipa ong·ani gimin USTM pangnan uko mitteljringgen ine parakataha.
“PA Sangma sagi, saksa niksamsoani gnang kamko ka·gipa ong·e pangnan chadamberangko a·gilsakni seng·anichisa dal·droatna sikgipa mande ong·a. Uni chingna dakchakanirangko on·ahani gimin aro Meghalaya a·doko chubata gadangni lekka porako tang·doatna kamko ka·ahani gimin USTM, uko pangnan mitteljringgen,” ine USTM-ni Chancellor aganaha.
PA Sangma sagi aro RS Mooshahary sakgnian, USTM-ko atchiatanio mongsonggipa manderang ong·a ineba Hoque aganaha.
Meghalaya a·dokni gitcham Education Minister-rang, chong·motan Donkupar Roy aro Manas Chaudhuri-koba USTM-ni Chancellor mittelpilangaha.
