TURA: Samtangtangko rongtal an·tale rakkina man·na gita Swachh Bharat Mission (Grameen)-ni ning·o Waste Collection e-Vehicles ba jabol chimongani electronic garirangko Mongolbar salo, Meghalaya Assembly-ni Speaker Thomas A Sangma aro PHE Minister Marcuise N Marak, East Garo Hills, West Garo Hills, South Garo Hills, North Garo Hills aro South West Garo Hills a·jao donggipa Village Water & Sanitation Committee (VWSC)-ni membor-rangna sualataha.
Ia garirangko sualatna gita dingtangmancha tom·aniko, Jengjal-ni Baljek Airport-o ong·atangaha aro ia tom·anio, Kharkutta-ni MLA Rupert Momin, Salmanpara MLA Ian Botham K Sangma, Jengjal-ni MDC Grahambel A Sangma aro dingtang dingtang officer-rangba dongpae bak ra·angtokaha.
Ia garirangko sualatna gita tom·aniko ong·atanio Meghalaya Assembly-ni Speaker Thomas Sangma, jinmana aganprakengon, ian gital kolrangchi samtangtango rongtal an·talaniko rakkina gita India a·songni re·mikkanganiko mesokani ong·enga ine parakataha.
India a·songo skatang a·pal re·aniko bon·atna aro rongtal an·talaniko rakkina gitasa Swachh Bharat Mission-ko a·bachengatahachim ine janapatengon, ia Mission-ni ning·o jabolrangko galna gita electronic garirangko sualataniara jillarangosan ong·aigija songadam nokadamrangoba pangkamgipa namroro silroroaniko ra·bana ja·ku de·ani ong·enga ine Sangma parakataha.
Ia tom·anio a·dokni PHE Minister Marcuise Marak-ba jinmana aganprakangengon, a·songo rongtal an·talaniko rakkina miksonganio ia electronic garirangko India sorkarini a·bachengatgipa Swachh Bharat Mission (Grameen)-ni ning·o sualatenga ine talataniko on·angenba, Meghalaya a·dokoba ia Mission-ko a·bachengataoni Open Defecation Free (ODF) Plus-o 84 percent-ni gita chu·sokgipa ong·na man·aha ine parakataha.
