SHILLONG: SSA skulrango skigiparang chu·ongjaengani a·selsa Meghalaya a·doko poraianiko dontongenggipa chatro chatrirang batrorobaenga ine Meghalaya SSA School Association (MSSASA) a·kangataha.
MSSASA-ni president Aristotle C Rymbai-ni kobor ra·timgiparangna parakatani gitade, bi·sarangko skulrango napatna miksongani gnangsa ma·mong sorkari, Samagra Shiksha Abhiyan (SSA)-ko a·bachengatahachim indiba SSA skulrango skigiparang chu·ongjae bang·bata bi·sarangan skulrangchi re·na gisik nangtokskajaengachim.
Uamang, SSA-ni State Project Director Swapnil Tembe-ko grongenba, primary aro upper primary SSA skulrango bangbang ong·e dongenggipa skigiparangni kamko gapatchina didiaha ine Rymbai parakataha.
Ia bangbang ong·e dongenggipa kamrangko 2021 bilsionin gapatkujaengachim ineba ua aganaha.
MSSASA president-ni parakatani gitade, gipin kamrangko man·e skigipani kamko watanggipa SSA skulrango sorkari, bangbang ong·gipa biaprangko gapatgija donchipahani a·sel bang·a SSA skulrangon chatro chatrirang sak 50 ba sak 60-oni sak 10-mangona komiangaha.
Indake ong·engon, MSSASA-ni janapgipa kamrangni bidingo ua a·dok sorkari baksa agangrikskagen ine Tembe, uamangna ku·rachakaniko on·ataha ine Rymbai parakataha.
Je skulrangon chatro chatrirang dongsrangjahachim, uandakgipa skulrangkode sorkari chipna nangaon ga·akaignok ineba Tembe, association-ni dilgiparangna aganataha.
“Uni gimin iako ma·sie ra·china chinga SSA skigiparangko didiatna sikenga,” ine Rymbai aganaha.
Bangbang ong·e dongenggipa kamrangko sorkari gapatna miksonganirang dongama dongja uko ma·sie ra·na gita uamang a·dokni Education Minister Rakkam A Sangma-koba gronggen ineba MSSASA-ni president parakataha.
