SHILLONG: Delhi aro Shillong-o party-ni seokgipa representative-rangko namnikgijagenchimoba aro NPP-ni gita opposition-o sudodogenchimoba Garo Hills a·jao BJP-NPP maming bakrimani dongja ine State BJP vice president aro Tura MDC, Bernard Marak Sonibar salo aganaha.
“Delhi aro Shillong-o haida bakrimani dongengnaba donga indiba uamang Garo Hills-o BJP dolko opposition-o dona aro uamang Garo Hills-o bakrimani gimin aganna dongja,” ine Marak aganaha.
NPP dol jean BJP dolko opposition-ona sokdoatani gimin ua aganangaha, “Chinga party-oni seokako man·giparang ong·a aro uamang chingko on·rikgipa ma·gipa dake ra·enga aro uamang chingko manderangna cha·bokani aro kakketgijani kosako agane on·jachina ka·dongsoenga ong·ode, chinga sorkarini kosako aganangjawa indiba beneficiary-rangna on·enggipa scheme-rango chingni dilgipako napchapatna nanga.”
“NPP chingni bakrimska ong·genchimoba jensalo beneficiary-rang namgnirangko man·jaenga unode chinga jaksi ote agantelaigen. Chinga uamangko chadrapjaenga indiba uamangna ia ong·gijagipakosa mesoke on·a jotton ka·enga. Jensalo an·ching bakrimani gimin agangrika angade iano maming bakrimaniko nikja aro Garo Hills-o bakrimani bidingo uamang gisiko nangchongmota ong·ode ching baksa agangrikna nanga,” ine ua agandapangaha.
“Chingko namnikgija dake chanenga, chingni manderangko bang·a mamlarango rim·enga aro uamang bakrimani gimin aganenga, ian kragijagipa ong·a uamang agangrikna namnika ong·ode chingaba ready ong·a indiba chingni mesokani gimikan scheme-rangni gimin ong·a jekon kangalrangna sokatna nanga aro ian party-ni nikjumangsogipa ong·a,” ine ua aganangaha.
“Gareebi hataw, ia cholrang gimikko kangalrangni janggi tanganiko nambataona ong·angna chinga nangnika aro jensalo chinga iarangko jakkalsretaniko nika aro system-o jedakgipa ong·gijaniko chinga nika ong·ode chingade iani bidingo agantelgen,” ine ua agandapangaha.
