SHILLONG: Meghalaya a·doko seat-rangko sualgrike susana gita Trinamool Congress (TMC) baksa agangrikchenggija seat damgnina, chong·motan Shillong aro Tura parliamentary seat-rangna candidate-rangko parakatahani gimin Robibar salo, TMC Parliamentary Party-ni dilgipa Mukul Sangma, Congress dolko matnangataha.
All India Congress Committee (AICC)-ni dilgipa Jairam Ramesh-ni agangipa kattarangko jegalatengon, Meghalaya a·doko Congress dol, chong·mot a·selrangkon sandina gisiko nanggiparang ong·ja ine Sangma matnangataha.
“Chinga ru·uta somoirangnan sengchae dongaha aro a·song gimikan Meghalaya a·doko dolgnini kamrangko nichake dongengachim. INDIA bloc-ni ning·o bilakgipa ong·na man·na gitasa dolgnini gisepo seat-rangko sualgrike, seat ge·prako candidate sakprakko susaatna miksonganirang dongachim,” ine TMC-ni dilgipa aganaha.
Gimik sak 42 candidate-rangko parakna skang TMC sengjaha ine da·alo Congress agangenchimode, uamang an·tangtangan a·doko ong·enga obostarang baksa re·jaha ine Congress dolko gisik ra·atpilna gita man·aigen ineba Sangma aganaha.
“Meghalaya a·dokni seat damgnina uamang an·tangtangni candidate-rangko parakkujama? Meghalaya a·doko Lok Sabha seat damgni donga aro uamang ia seat damgninan an·tangtangni candidate-rangko parakatmanaha,” ineba Sangma aganaha.
Shillong Lok Sabha seat-oni susana da·o ong·enggipa MP Vincent H Pala-ko aro Tura Lok Sabha constituency-na Gambegre-ni MLA Saleng A Sangma-ko candidate dake re·anggipa Sukrobar salosan AICC parakatmanahachim ine nikna man·a.
