TURA: Garo Hills Autonomous District Council (GHADC)-o batanggimin bilsi 72-na Indian Constitution-ni Article 244 (2) aro 275-ni ning·o dongimin Sixth Schedule-ni Paragraph 20-ko pe·e gipin jatrangba election-rango bakko ra·aha ine New Tura Development Forum (NTDF) parakatenba, GHADC-ni kamrango aro election-rango gipin jatrang, mongsongbate Tribal ong·gijagipa manderangde bak ra·pana man·jana gita dingtang electoral roll-ko tarichina, GHADC-ni Chief Executive Membor (CEM)-na gisik ra·attaianiko on·angaha.
NTDF-ni general secretary LC Momin-ni parakatani gitade, Indian Constitution-ni Sixth Schedule-o pangchake GHADC-ara Garo Hills-ni Tribal-rangko aro mongsongbate A·chikrangko chel·chakna on·gimin bimangsa ong·ani gimin district council-ni kamrango aro election-rango gipin jatrangde bak ra·pana bil dongjachim.
“Iani bidingo 2023 bilsini July 6 tarikon chinga nang·ko nang·ni office-o grongenba apsan chanchirimahachim indiba ua somoio nang·ni ku·rachakgimin gita chinga maming kamrangko nikkujaengani gimin da·alo nang·na gisik ra·atpilaniko on·na iako seatenga,” ine Momin, GHADC-ni CEM-na sedoatgipa chittio janapataha.
Indian Constitution-ni Sixth Schedule-o pangchake Tribal ong·gijagipa manderang aro gipin jatrangko bia ka·e an·chi bringimin Tribal-rangde GHADC-ni election-rango bak ra·na bil dongjachim ine janapatengon, GHADC-ni election-rango Tribal ong·gijagipa manderangni bak ra·aniko champengani mingsa cholde dingtang electoral roll-ko jakkalanian ong·enga ine NTDF-ni general secretary gisik ra·attaianiko on·angaha.
“Da·alona kingkingan State Assembly aro gipin election-rango jakkalenggipa apsan electoral roll-rangkon GHADC-oba jakkalenga aro ia electoral roll-rango gipin jatrangba biming dongani gimin gipin jatrangni pu·onani aro susaanirangko champengna man·jaenga. Uni gimin state Assembly aro uandakgipa gipin election-rangko jakkalgipa electoral roll-rangko GHADC-ni election-rango jakkalgija dingtang electoral roll-ko tarina nangenga,” ine Momin parakataha.
Constitution-ni Sixth Schedule-o on·gimin niamrangara, Meghalaya a·dokko man·chape Assam, Mizoram aro Tripura a·dokni Hill Tribal District-rangnaba nangchakeani dongani gimin Khasi aro Jaintia Hills a·jarangoba gipin jatrangde ADC election-rango bak ra·na man·ja indiba Garo Hills-ode 1952 bilsionin gipin jatrang bak ra·na man·engkua ineba Momin, suk ong·gijaniko parakataha.
“Uni gimin a·songo dongimin niamo pangchake GHADC-ni election-rangoba gipin jatrang bak ra·pana man·jana gita ta·raken dingtang electoral roll-ko tarichina chinga NTDF-ni gita nang·ko mol·molatenga,” ine NTDF-ni general secretary, GHADC-ni CEM-na sedoatgipa chittio janapataha.
Momin-ni parakatani gitade, 2025 bilsion GHADC-ni election-ko ong·atani somoi ong·engahani gimin da·o ta·raken dingtang electoral roll-ko tarigenchimode ia electoral roll-ko re·baenggipa GHADC-ni election-o jakkalna man·gnokchim.
