SHILLONG: Meghalaya a·dokni Congress dolko NPP-ni ‘A team’ aro BJP-ni ‘B team’ ine matnangatani ja·man Voice of the People’s Party (VPP)-koba BJP gitan apsan niamrangko ja·rikgipa gita ong·a ine Mongolbar salo, Meghalaya Pradesh Congress Committee (MPCC)-ni president aro Shillong Lok Sabha-ni Congress candidate Vincent H Pala matnangatskaaha.
“VPP-ni kamrangko nigenchimode, uamangara BJP-ni team A ba team B-san ong·aija indiba BJP-ni chanchiani gitan chanchigiparang gita nika,” ine Pala aganaha.
Pala-ni aganani gitade, jekai BJP, mondolini dilgiparangko matnanga apsan daken VPP-ba mondolini dilgiparangko matnangronga aro jekai BJP, toromni bidingo agana apsan daken VPP-ba toromni bidingo aganrongachim.
Iarangni bidingo talataniko on·china VPP-o dabiangengon, VPP-ni kamrangni gimin aro manderangko salna jotton ka·engani gimin social media-rangon manderangni matnangako man·tokengaha ine Pala aganaha.
Uni kosako matnange agana agrede VPP-o gipin kamrang dongja ineba Pala aganaha.
“Ia election-o Ardent Basaiawmoit-an susaengama Ricky AJ Synkon-an susaengama darangba VPP-ni candidate-kon name aganna man·tokjaenga. Election-rango chena gita pangnan VPP, Ardent Basaiawmoit-ni noksaosan pangchaktokenga,” ine MPCC-ni president aganaha.
Dingtang dingtang kamrangni bidingo ku·rangko on·na a·bachengmiting somoirangode Ardent Basaiawmoit pangnan dongsiksake mesokronga indiba ia kamrangna ku·rang on·anio kim·kim ong·rongja ineba Pala matnangataha.
“Congress dolni gimin aganna skang VPP an·tangtangkon nichengna nanga,” ine ua aganenba, bang·a manderangan opposition-o ong·engmitingo chu·ongnikjae sorkarichipakna katna jotton ka·rongaia ine parakataha.
Ua darangkoba party-oniko a·rikgala dongkuja ine janapatengon, Congress dolni gitcham dilgiparang, an·tangtangsa party-oni ong·kate kataha aro election-na skangde manderang, pangnan dolsaoni dolsaona bilbate katrongaia ine Shillong MP parakataha.
Congress dolni MP, skanggipa Garo Hills-ni dilgipa Mukul Sangma aro unbaksa bakrimska dilgiparangko ong·katatchengna man·aha aro NPP-ni mongsongbatgipa bobilkon ra·galatna man·aha ine iana skang VPP matnangatahachim ine nikna man·a.
