TURA: Jatni doka dam·anirangko dokna dam·na aro tarina gita skie on·na miksonganio Tura-ni A·chik Literature Society (ALS), NEHU Tura Campus-ni Garo Department aro Tura Don Bosco College-ni Garo Department baksa nangrime salbongana ong·atanggipa regional workshop, re·anggipa March-ni 22 tariko matchotangaha.
Ia workshop-ko matchotatna gita program-ko ALS-ni executive membor Basan R Marak dilangaha aro ia tom·anio, A·chikrangoni git ring·anina mingsing minggamako man·gipa aro jatni doka dam·ani bidingo u·i-ma·sigipa Iris Watre Thomas, mongsonggipa sokgipa ong·e bakko ra·angskaaha.
Ia tom·anio Ma Thomas, tom·anio bak ra·giparangna aganprakengon, chigringko name tarie dingtang dingtang gam·ani key-o dokna man·a ine an·tangni am·sandie man·aniko jinmana parakataha.
Wangala chrokani mingprakna dama dokani ming sotbri rokomna bate donga ineba ua aganaha. Chadamderangko gisik nange jatni doka-dam·ani aro ring·anirangko skie ra·enba, an·tangtangna music band-rangko bikote jatko niksengatchina gitaba ua didiangaha.
Dingtangmancha okamako man·e re·bagipa Mikhail Ch. Marak-ni agananio, ua an·tangni git aro music-ko tarianio A·chik jatni doka-dam·aniko aro sulrangko nakatatna jotton ka·enga ine aganangskaaha. Ua jatni doka dam·anio gam·aniko nambate nakatatna tarina man·ode aro standardize ka·na man·ode nambatgen ineba aganaha.
Ia tom·anio Chimik magazine-ni editor Melky Chisim-ba dongpae, jinmana aganprakangengon, A·chik jatni man·rikbagimin doka-dam·aniko tarigiparang komiangengaha ine aganenba, uarangko ripingchina workshop-o skie ra·giparangko didiangaha. A·chikrangni dama bolko konge uko de·tome dokna man·e tariania a·gilsako damarangoni robatsranggiparangoni rokomsa ong·genkon ineba ua aganaha. Wa·aoniko tarigipa gongminakoba ua doke mesokangaha aro mikkangchi wa·ani aro silni gongminako niksengbate jakkalangchina didiangaha.
Prof Fameline K. Marak-ni agananio, workshop-o skie ra·giparangko, an·tangtangni changa-sapaniko sakgipinrangna skie on·skachina gita didiangaha.
ALS-ni vice president Dr. Colnat B. Marak-ba jinmana aganprakengon, chadamberang ning·tubate jattangni gimin skie ra·enba, chubate poraie jatni chrokani, doka dam·anikoba nambate tarina aro niksengatna nanga ine aganangaha.
ALS-ni secretary Dr. Crystal Cornelious D. Marak-ba jinmana aganprakengon, workshop-ona sokbagiparangko rimchaksoaniko agananio, ia workshop-ko ong·atanichi jatni minga-ring·ani aro doka-dam·aniko skie on·aniara A·chikkuko Indian Constitution-ni Eighth Schedule-o napatna dabianio mangrakbatatani ong·enga ine janapangaha.
Workshop-o skie on·giparangoni Dewal M. Sangma, chigringko a·ning chiningchiniko ra·gatdobaani doroe mesokaha aro Ringjeng T. Sangma, sarendachi “Nanggorere Goserong” aro “Sonatchi Khalsin”-ni gitni sulko sale mesokskaaha. Sakgipin dama aro grikako skie on·giparang Dirot Ch. Marak, Pa Dewal M. Sangma, aro Chingchak T. Sangma-ba dama bol gittamko apsan doke “Jajong Mikka Simdapa” aro gipin rokomo dama dokani ja·kurangko mesokangaha.
Workshop-o bak ra·giparang chigringrangko doke “Dimdimdimchong” gitko knatoe ring·tokskaaha. Bak ra·giparangoni Mario Attamrik R. Marak, bangsichi Jenden Ch. Marak-ni git “Do·rimitko Nikoba”-ni sulko sike jinmako an·saoataha.
Workshop-o donge skie ra·giparang, Wangala chrokaniko uamangni skie ra·giminoniko dama, bangsi, adilko jakkale grika baksa chroke mesokaha. Bakko ra·giparangoni sakgittam uamangni grikako skie ra·giminko jinma mesokangskaaha. Ia workshop-o skigiparangna aro bakko ra·giparangna mongsonggipa sokgipa Ma Iris Wa·tre Thomas aro gipinrangni jakchi certificate-ko suale on·angaha.
