TURA: BJP-ni gitcham state vice president aro Garo Hills Autonomous District Council (GHADC)-ni gitcham chief executive membor (CEM) Dipul R Marak, Budbar salo, National People’s Party (NPP)-o napangskaaha.
Meghalaya a·dokni Lok Sabha seat damgni, chong·motan Shillong aro Tura Lok Sabha seat-rango susagija NPP-na chakskana gita ma·mongo BJP-ko dilgiparang tik ka·ahani gimin Sombar salosan ua BJP-oni kamtangko wate ong·katahachim.
Indake ong·engon, Marak-ko Budbar salo NPP-ni candidate Agatha K Sangma-na campaign ka·na gita South West Garo Hills a·jani Gopinathkilla songo tom·bimonganiko ong·atanio, NPP-ni national president aro a·dokni Chief Minister Conrad K Sangma, NPP-ona rimchaksoaha.
Marak baksana una kamko ka·enggipa bang·a manderangba apsan salon NPP-o napangtokaha.
Marak aro uni manderangko NPP-ona rimchaksoangengon, uamangni re·baanichi ia Lok Sabha election-na kamrangko ka·anio NPP-ko bilakbatatgnok ine NPP-ni national president Conrad Sangma parakataha.
Koborko man·soani gitade, Garo Hills-o BJP-ni gipin dilgiparang aro kam ka·enggipa manderangba, BJP-ni state president aro ma·mong dilgiparangni kamo suk ong·jae BJP-oni ong·katna manchitokenga.
