TURA: Adita salrangna skang, South West Garo Hills a·jani biap damsao Lok Sabha election-na campaign ka·engmiting somoio Mahendraganj Assembly constituency-ni National People’s Party (NPP) MLA Sanjay A Sangma, ia chang Lok Sabha election-o BJP-ni candidate-kode NPP ‘switched off’ ka·atahani gimin BJP-na chakenggipa manderang NPP-na pu·onana agre chol dongjaha ine agananichi ua jolrango songdongenggipa Hindu manderangko aro BJP-ni membor-rangko gisik saataha ine BJP-ni state vice president aro Tura-ni MDC Bernard N Marak parakatenba, iani bidingo ua (Sanjay) kemako bi·na nangchongmota ine dabiangaha.
Marak-ni parakatani gitade, ia chang Lok Sabha election-o Meghalaya a·dokni Lok Sabha seat damgnion susagija NPP-ni candidate-rangna chakpaanirangko on·china ma·mongni dilgiparang ge·etaniko on·manahani giminsa Garo Hills-oba BJP-ni dilgiparang aro BJP-na kam ka·enggiparang, Tura Lok Sabha constituency-o candidate-ko susaatgija NPP-ni candidate-nan chakpaaniko on·engachim indiba NPP-ni campaign ka·ani somoio Mahendraganj MLA-ni iandakgipa kattarangko agananiara BJP-ni manderangko ‘chonnikani’ gitasa ong·skaahachim.
Iani bidingo NPP-ni national president aro Meghalaya a·dokni Chief Minister Conrad K Sangma-na seachi u·iatengon, “Adita salrangna skang, South West Garo Hills a·jani Nandichar songo NPP-ni candidate-na campaign ka·engmiting somoio Mahendraganj-ni MLA Sanjay A Sangma, ‘ia chang Lok Sabha election-o BJP-ni candidate-ko NPP switched off ka·ahani gimin ia jolrango songdongenggipa dingtang dingtang Hindu jatrang aro BJP-na chakenggipa manderang NPP-na agrede pu·onani chol dongjaha’ ine aganaha aro uni iandakgipa kattarangko agananichi ia jolni Hindu manderangna aro BJP-na chakenggipa manderangna gisik saataniko ra·baaha,” ine Tura MDC parakataha.
Marak-ni parakatani gitade, iandakgipa kattarangko agananichi Mahendraganj MLA, Garo Hills-ode BJP-ko NPP-sa chalaienga ine mesokna jotton ka·ahachim.
NPP-ba BJP-chi dilenggipa NDA-o bak ong·paengani gimin Garo Hills-o BJP-ni manderangko NPP mande ra·na nangachim ine janapatskaengon, “South West Garo Hills a·jao chingni dilgiparang Sanjay Sangma-ko grongenba, iandakgipa kattarangko aganjachina mol·molahachim indiba ua Hindu-rangni kosako gisik saatani kattarangko aganaha ine ku·rachakna jechakaha. Uni gimin BJP-na chakenggipa aro dingtang dingtang Hindu jatrangni mol·molanio pangchake, Sanjay-ko kema bi·china anga mol·molenga aro mikkangchi iandake dolsa dolgipinko gisik saatani kattarangko aganjachina anga didienga,” ine BJP-ni state vice president parakataha.
Marak-ni parakatani gitade, Mahendraganj MLA-ni ia kattarangko aganani somoio NPP-ni national president Conrad Sangma-ba dongpaachim.
