SHILLONG: 2019 bilsio Citizenship Amendment Bill (CAB)-ko BJP-chi dilenggipa NDA sorkarini Parliament-o pass ka·anio chakpaaniko on·ahanina National People’s Party (NPP)-ni candidate aro Tura-ni MP Agatha K Sangma-ko Opposition dolrang matnangtokengon, Meghalaya a·dokni Sixth Schedule a·jarangko watani ja·mansa Tura-ni MP ia Bill-na chakpaaniko on·aha ine NPP-ni dilgiparang parakatskaaha.
“Taridapgimin Bill-ko Parliament-ona ra·baon uamang niamrangko tarimanahachim aro Meghalaya a·dokba Sixth Schedule a·jao ga·akgipa biap ong·e ia niamoniko watchanggalako man·aha. Iano pangchakesa ua somoio Tura-ni MP Agatha Sangma-ba ia Bill-na chakpaaniko on·aha. Uni gimin je manderangan iako ma·sikujaengachim ma·sie ra·china mol·molenga,” ine Mongolbar salo, NPP-ni state president aro a·dokni Deputy Chief Minister Prestone Tynsong parakataha.
Meghalaya a·dokni 2.5 percent biaprangsan Sixth Schedule a·jao ong·jae CAA-ni ning·o ga·aka indiba bang·bata biaprangan Sixth Schedule a·jao ga·akgipa biap ong·ani gimin CAA-oniko watchanggalako man·aha ine janapatengon, “Sawa ia Sixth Schedule a·jarango CAA-oniko jokatna kamko ka·aha? Iako kamko ka·gipade VPP ong·ja indiba NPP-ni national president Conrad K Sangma-sa salgro salaram jol gimikoni ia kamko ka·dilaha. Ua somoio anga an·tangba unbaksa dongpaachim aro chinga Union Home Minister baksana Prime Minister-koba iani bidingo grongna somoiko ra·aha,” ine Tynsong aganaha.
Prime Minister aro Union Home Minister-ni mikkango jegalanirangko dakani ja·man Union Home Minister baksa tom·aniko ong·ataha aro ia tom·aniona Chief Minister Conrad Sangma, pilak NGO-rangni dilgiparangkoba re·dilangaha ineba NPP-ni state president aganaha.
“Meghalaya a·doko CAA-ko jegaltokengani gimin Union Home Minister, manderangni nangnikaniko ma·sichakaha aro Meghalaya a·doko donggipa autonomous district council-rang pilakan Sixth Schedule a·jaon ga·akani gimin CAA-oniko watna ku·rachakaha. Ian da·alo chu·sokgipaba ong·aha,” ine Tynsong aganaha.
“Ia kamrangko sawa man·e on·aha? Ia pilakan chingni national president-ni dilanichi NPP-ni chu·sokatgipa kaman ong·a aro iako pilak NGO-ni dilgiparangba mikrontangchi nikaha,” ineba ua aganaha.
