TURA: Meghalaya a·doko NPP-chi dilenggipa MDA sorkarini kamrango bang·en dakgualanirang dongani giminsa a·dokni manderang, mongsongbate chadamberang sorkarini kosako suk ong·tokjaenga ine Mongolbar salo, Trinamool Congress (TMC) parliamentary party-ni dilgipa Mukul Sangma matnangataha.
Garo Hills-o TMC-ni candidate Zenith Sangma-na campaign ka·engmiting somoio kobor ra·timgipa mandrerang baksa agangrikengon, Meghalaya a·doko bang·a manderangni janggi tangani cholrangkon MDA sorkari bon·atahani giminsa a·dokni manderang sorkarini kamna suk ong·tokjaenga ine Sangma parakataha.
“Ma·mong sorkarini ra·gate on·atgipa bang·bata scheme aro program-rangko chu·sokatanion dakgualanirangko bang·en nikna man·enga. Meghalaya a·doko merong aro manderangni nangchongmotgipa ma·manti bostuni damrang namen rakbataha aro ian manderangni janggi tangani neng·nikanirangko on·enga,” ine ua aganaha.
Chadamberangna janggi tangani cholrangko on·enga ine MDA sorkarini tol·pinapgipa kattarangara namen ra·chakna man·gijani ong·a ine janapatengon, bangbang ong·e dongenggipa kamrangko gapatgija donchipenga aro ia kamrango contractual dakesa sorkari kamrango rakkiskaenga ine TMC parliamentary party-ni dilgipa matnangataha.
Garo Hills-o niam gri gue badingna on·engani gimin MDA sorkariko matnangatengon, iandake gipin a·songni guerangko niam gri ra·baahani a·selan gueni dam rang·san tang·onangaha aro gue bagan dake cha·enggipa manderang neng·nikanirangko chagrongna nangtokaha ine Sangma parakataha.
Citizenship Amendment Act (CAA)-ni bidingo janapatskaengon, ia niamko ra·gatani gimin ua Tura-ni MP aro Congress candidate Saleng A Sangma-koba matnangataha.
“2019 bilsio CAB-ko pass ka·na skangan salgro salaram jolrango songdongenggipa manderang iako raken jegalsotokahachim indiba Tura-ni MP-ba iana chakpaaniko on·ahani a·sel da·alo iako pilak biaprangon ra·gataha. Ia CAB-ko pass ka·anio Tura-ni MP Agatha Sangma baksana MDA sorkario bak ong·pagipa Congress candidate Saleng A Sangma-ba jak donga maina uamang sakgnian ia Bill-na chakpagiparang ong·a,” ine TMC-ni dilgipa aganaha.
NPP, BJP aro Congress dolni gisepo meli nangrimani donga ine matnangatengon, ia dolrangni nangrimanio MPCC-ni president Vincent H Pala-an dakdilgipa ong·a ine Sangma parakataha.
